Organizata të ndryshme të shoqërisë civile zhvilluan një aksion simbolik para Kuvendit të Kosovës, duke shprehur pakënaqësinë e tyre ndaj bllokimit të vazhdueshëm të procesit të konstituimit të këtij institucioni.
Ky aksion u organizua pak para nisjes së përpjekjes së 22-të për konstituimin e Kuvendit, që tregon shqetësimin për ngecjen e procesit demokratik në vend, transmeton Telegrafi.
Para hyrjes së Kuvendit janë vendosur ulëse që simbolizonin sallën plenare, ndërsa mbi to u vendosën pankarta me mesazhe kritike ndaj deputetëve, të cilat sipas organizatorëve, pasqyrojnë papërgjegjshmërinë dhe mungesën e përkushtimit ndaj qytetarëve.
Disa nga mesazhet e vendosura në karriget simbolike ishin “120 rroga, 0 përgjegjësi”, “Deri kur?”, “Cirku i demokracisë”, “Ky nuk është serial – është shteti ynë” ,“Për çka ju kemi zgjedhur?”.
Ndryshe, Kuvendi nuk po arrin të konstituohet, pasi partia fituese e zgjedhjeve LVV, nuk po arrin të sigurojë votat e mjaftueshme për kandidaten për kryeparlamentare, Albulena Haxhiu./Telegrafi/
