Dinamo ka përpara një ndeshje shumë të rëndësishme në fazën në grupe të Ligës së Evropës. Në raundin e pestë ata udhëtojnë te Lille dhe kërkojnë pikë që do t’i afronin ndjeshëm me fazën me eliminim direkt.
Fundi i pjesës së parë të sezonit tradicionalisht është periudha më e vështirë për klubin dhe forma e rënë para fillimit të nëntorit e bëri ekipin të dukej pothuajse i panjohshëm. Në atë periudhë, Dinamon e mbajti në lojë vetëm Arbër Hoxha.
"Nuk është për Dinamon", thoshin tifozët.
I ardhur në janar 2024, Hoxha u vendos menjëherë në shënjestër të kritikave. Dyshimet u shtuan nga insistimi i trajnerit Jakirovic, i cili e quajti “raketë” dhe nga dëmshpërblimi i lartë i paguar për të.
Megjithatë, ai luajti role vendimtare: asistoi në suksesin ndaj Betisit, shënoi në Selanik dhe realizoi golin vendimtar kundër Rijekës, që orientoi Dinamon drejt titullit.
Sezonin e kaluar ai pati më pak hapësirë për shkak të ardhjes së Marko Pjacës, duke u konsideruar madje si dështim nga një pjesë e tifozëve. Verën e kaluar ishte afër largimit, por Zvonimir Boban insistoi që ai të qëndronte, duke besuar në potencialin e tij.
Tre muaj e gjysmë pas nisjes së sezonit, qëndrimi i Hoxhës doli vendimtar. Ai është lojtari më i rrezikshëm i Dinamos dhe i vetmi në vijën sulmuese me formë të qëndrueshme. Për këtë arsye u shpërblye me një kontratë të re.
Dy momente nga derbi me Hajdukun tregojnë më së miri karakterin e tij.
Në pjesën e parë, pas një pasimi perfekt të Misict, ai e humbi një shans të artë për shkak të kontrollit të dobët të topit. Megjithatë, pak minuta më vonë, ai mori topin 60 metra larg portës, kaloi dy kundërshtarë dhe shënoi një gol të jashtëzakonshëm që vendosi ndeshjen dhe riktheu Dinamon në binarë.
Hoxha përfaqëson kontrastet e tij: vendimmarrje e herëpashershme e dobët, por eksplozivitet dhe rrezik konstant. Ai është lojtari më i paparashikueshëm i Dinamos – gabon ndonjëherë, por gjithmonë i aftë të ndryshojë ndeshjen me një veprim të vetëm./Telegrafi/