Barcelona po shqyrton rikthimin e Oscar Mingueza nga Celta Vigo, teksa kërkon të forcojë krahun e djathtë të mbrojtjes për sezonin e ri.
Pasi objektivi kryesor, Denzel Dumfries, mbetet një pistë e pasigurt, Barça ka filluar të vlerësojë alternativa më të arritshme dhe ekonomike. Mingueza shihet si një zgjidhje realiste dhe me kosto të ulët.
Sipas Sempre Barca, 26-vjeçari konsiderohet si një plan rezervë në rast se transferimi i Dumfries nuk realizohet. Barcelona mban ende 50% të klauzolës së shitjes së tij, çka mund ta ulë ndjeshëm çmimin e rikthimit.
Edhe pse nuk ekziston një klauzolë zyrtare riblerjeje, aksionet që mban Barça në të ardhmen e lojtarit mund t’i lejojnë ta marrin për rreth 10 milionë euro, gjysma e vlerës së tij aktuale në treg.
Mingueza është një produkt i akademisë La Masia dhe ka luajtur 66 ndeshje me ekipin e parë para se të transferohej në Celta në vitin 2022. Ai ka eksperiencë dhe njohuri të thellë mbi stilin e lojës së Barcelonës.
Mingueza sezonin e fundit ka zhvilluar 34 ndeshje në La Liga, teksa ka shënuar katër gola dhe ka asistuar në gjashtë të tjerë.
Shkathtësia e tij në mbrojtje dhe aftësia për të mbuluar disa pozicione e bëjnë një kandidat të vlefshëm për të mbështetur Jules Kounde në të djathtë.
Duke pasur parasysh kufizimet financiare që vazhdojnë të ndikojnë strategjinë e transferimeve, kthimi i Mingueza shihet si një alternativë pragmatike dhe e besueshme për katalanasit. /Telegrafi/