Arrestohet në Morinë shtetasi nga Kosova i shpallur në kërkim nga Gjermania, pritet ekstradimi

Policia Kufitare në Morinë ka arrestuar sot, me qëllim ekstradimin drejt Gjermanisë, një 45-vjeçar nga Kosova, i kërkuar ndërkombëtarisht për krime ekonomike.

I arrestuari, Armend Morina, 45 vjeç, banues në Gjakovë, rezulton i dënuar me burgim nga autoritetet gjermane.

"Gjatë përpunimit dhe verifikimit të të dhënave në sistem, ky shtetas ka rezultuar i shpallur në kërkim nga autoritetet gjermane, pasi Gjykata e Wangen, me vendimin e datës 08.06.2021, e ka dënuar me 1 vit e 6 muaj burgim, për veprën penale "Mashtrimi dhe mbajtja e sendeve të vjedhura ", parashikuar nga legjislacioni penal i Gjermanisë", thuhet në njoftimin e policisë.

Në përfundim të veprimeve procedurale për këtë rast, specialistët e Seksionit për Hetimin e Krimeve Ekonomiko-Financiare të DVP Kukës, e arrestuan përkohësisht këtë shtetas, me qëllim ekstradimin drejt Gjermanisë.

Interpol Tirana, në bashkëpunim me autoritetet gjermane, vijon procedurat për ekstradimin e 45-vjeçarit. /Telegrafi/