Apple me aplikacion të ngjashëm me ChatGPT para arritjes së asistentit të gjeneratës së re të Sirit
Burime nga Apple kanë zbuluar se kompania nga Cupertino ka krijuar një aplikacion të ngjashëm me ChatGPT-në, i cili është i dedikuar për iPhone dhe ndihmon ekipin e inxhinierëve në zhvillimin e gjeneratës së ardhshme të asistentit Siri të bazuar në modele të mëdha gjuhësore (LLM).
Sipas burimeve, departamenti i inteligjencës artificiale po përdor një aplikacion të brendshëm për të testuar funksione të reja të Siri-t, përfshirë aftësinë për të kërkuar informacione personale si këngë, email-e, fotografi, video, etj. Gjithashtu, është i aftë të kryejë veprime brenda aplikacioneve, si për shembull redaktimi i fotove.
Aplikacioni ka emrin e koduar "Veritas" dhe për momentin është krijuar vetëm për përdorim të brendshëm. Apple nuk ka plane ta ofrojë për përdorim nga konsumatorët, pasi është i dedikuar vetëm për testimin e funksioneve që ekipi i Siri-t është ende duke zhvilluar.
Aplikacioni Veritas funksionon njësoj si ChatGPT. Përdoruesi mund të bisedojë me modelin gjuhësor të Apple, dhe softueri ruan bisedat e mëparshme. Megjithatë, drejtuesit dhe zyrtarë të tjerë të Apple kanë shprehur disa herë hezitim për të hyrë në tregun e chatbot-ëve me inteligjencë artificiale. Prandaj, vendimi për të mos e publikuar Veritas nuk është edhe aq befasues.
Siri i ri është i fuqizuar nga inteligjenca artificiale dhe është shumë më i zgjuar, dhe fillimisht ishte planifikuar të lançohej këtë pranverë, por Apple e ka shtyrë publikimin.
Afati i ri për prezantimin në treg tani është vendosur për marsin e vitit të ardhshëm. Ndërkohë, Apple ka filluar bisedime të avancuara me kompanitë OpenAI, Google dhe Anthropic për të marrë ndihmë në zhvillimin e Siri-t të ri.
Apple planifikon ta integrojë inteligjencën e vet artificiale edhe në pajisje të tjera, përfshirë pajisje shtëpiake, altoparlantin HomePod dhe Apple TV. /Telegrafi/