Abrashi: Ligji për Prishtinën e rrit buxhetin e Komunës për disa miliona euro (Video)

Kandidati për kryetar të Prishtinës, nga Lidhja Demokratike e Kosovës (LDK), Arban Abrashi, në një intervistë për Telegrafin, ndër të tjera ka folur edhe për qasjen që ai do të ketë nëse e merr drejtimin e Prishtinës, gjatë katër viteve të ardhshme.

Abrashi ka treguar për dobitë që do t’i ketë “Ligji për Prishtinën”, duke shtuar se ndër përfitimet kryesore do të jetë se do të rritet buxheti i komunës, për shkak se sipas tij, do të subvencionohet me grante nga buxheti i shtetit.

“Buxheti rritet për disa milionë, duke e mundësuar që të ketë më shumë projekte dhe më shumë mundësi për promovim të Prishtinës dhe projekteve të Prishtinës. Aspekti buxhetor do të lehtësohet me këtë ligj”, ka shtuar Abrashi.

Sipas tij, një angazhim tjetër nëse e fiton besimin e qytetarëve të kryeqytetit, do të jetë edhe puna me Pallatin e Rinisë, i cili beson se shumë shpejt do të jetë nën pronësinë e komunës.

“Është trashëguar një borxh, dhe nuk mendoj se është problem që komuna me i marrë ato borxhe, sepse do të tentohej që pagesa të bëhej në disa vite. Pa dyshim se ka nevojë për investime, por edhe renovimet tjera të sallave, që janë rindërtuar”, ka shtuar Abrashi. /Telegrafi/