Zelensky shkarkon kreun e Gardës Shtetërore ukrainase pas përpjekjes për atentat ndaj tij

Presidenti ukrainas, Volodymyr Zelensky, ka shkarkuar kreun e agjencisë përgjegjëse për mbrojtjen e tij pasi dy oficerët e saj u arrestuan nën dyshimet për atentat kundër tij.

Bëhet e ditur se shkarkimi i Serhii Rud të Gardës Shtetërore (UDO) është zbuluar në një dekret në faqen presidenciale të Ukrainës, ndërsa një zëvendësim i tij ende nuk është bërë.

Siç raportohet, UDO ka për detyrë të garantojë sigurinë e presidentit ukrainas dhe zyrtarëve të lartë shtetërorë, si dhe mbrojtjen e ndërtesave administrative.

Ndryshe, në fillim të kësaj jave doli se Ukraina ka arrestuar dy zyrtarë që dyshohet se ishin të përfshirë në komplotin rus për vrasjen e Zelenskyt, shkruan CNN, përcjell Telegrafi.

Lexo po ashtu Parandalohet atentati ndaj Zelenskyt, pjesëtarët e inteligjencës ukrainase arrestojnë agjentët rusë – planifikonin rrëmbimin dhe vrasjen e tij

Zyra e prokurorit tha se njëri nga të dyshuarit është pajisur me dronë dhe municione nga shërbimi i sigurisë shtetërore ruse (FSB), të cilat synonin t’i dërgonin te një bashkëpunëtor tjetër për ta kryer shpërthimin.

Të dy kolonelët tani po akuzohen për tradhti; njëri po akuzohet edhe për përgatitje të një akti terrorist.

Shërbimi i Sigurisë Shtetërore të Kievit (SBU) tha se planet për të vrarë presidentin dhe zyrtarë të tjerë “kanë dështuar”, duke përfshirë planet për vrasjen e kreut të SBU-së, Vasyl Maliuk dhe kreun e inteligjencës së Mbrojtjes së Ukrainës, Kyrylo Budanov.

Zelensky thuhet se disa herë është përballur me atentate që kur Rusia ka filluar pushtimin e saj në shkallë të plotë në Ukrainë. /Telegrafi/