Videoja që shokoi Gjermaninë: E nxjerrin emigrantin me dhunë nga dyqani dhe e lidhin për druri (Video)

Policia gjermane është vënë në kërkim të tre burrave, që kishin lidhur për druri një emigrant nga Iraku.

Policia në Goerlizts ka bërë të ditur sot, se 21-vjeçari nga Iraku ishte duke biseduar me punonjësin e një dyqani në Arnsdorf për shkak të kartelës telefonike të dëmtuar, kur tre burra me maica të zeza u futën në dyqan dhe e tërhoqën zvarrë jashtë duke e lidhur për druri, transmeton Telegrafi.

Por, raportohet se të dyshuarit kishin ikur nga vendi i ngjarjes në momentin që kishin dëgjuar se policia po vjen.

E përditshmja gjermane Bild, sot ka publikuar pamjet e videos që po qarkullon në ueb faqet e organizatave djathtiste, në të cilën mund të shihen të dyshuarit duke e nxjerr nga dyqani emigrantin nga Iraku.

Policia është duke kërkuar dëshmitarë që mund të identifikojnë sulmuesit, por ata janë vënë në kërkim edhe të emigrantit për të cilin punonjësit e dyqanit kanë deklaruar se i kishte kërcënuar me shishe të xhamit. Sipas Bild, i riu nga Iraku vuan nga problemet psikike. /Telegrafi/