Veseli premton ngritje të pagave për mjekët

Kryetari i PDK-së, Kadri Veseli, tha të premten në Kamenicë se kjo komunë ka nevojë për zhvillim ekonomik, vende të reja të punës dhe u bëri thirrje qytetarëve të kësaj komune që më 11 qershor t’i mbështesin kandidatët e koalicionit PDK-AAK-Nisma.

Veseli tha se do të orientohen në sektorin e bujqësisë, e cila është motor i zhvillimit ekonomik dhe premtoi se buxheti për bujqësinë do të dyfishohet me qeverisjen e koalicionit.

Kreu i PDK-së theksoi se gjatë qeverisjes së koalicionit PDK-AAK-Nisma do të ketë avancim të gruas dhe të rinjve, pasi një shtet nuk mund të ecën përpara pa fuqizimin e grave dhe të rinjtë.

Veseli tha se do të ngritin pagat e mjekëve dhe nuk do të lejojnë që të dalin 200 milionë euro nga Kosova për shërim jashtë vendit.

Për më tepër, ai përsëriti se janë bërë bashkë ekipi i lirisë, i cili nuk është kundër askujt, por për qytetarët dhe Kosovën, përderisa i ka ftuar kamenicasit që më 11 qershor të dalin të votojnë dhe t’i mbështesin kandidatët e koalicionit PDK-AAK-Nisma.