U mbajt greva e administratës gjyqësore (Video)

E tërë administrata gjyqësore në vend sot hyri në grevë. Grevistët kërkojnë nga ministria e Drejtësisë, rritje të pagës deri më 35 %. Sindikata e punëtorëve gjyqësorë thotë se nuk do të ndalen me kërkesat e tyre, dhe se grevës i janë përgjigjur pozitivisht 95 % anëtarë të administratës gjyqësore në vend dhe se greva do të vazhdojë çdo ditë, në shenjë revolte, transmeton Telegrafi Maqedoni

“Kërkesa është, rritja e rrogave në lartësi prej 35 për qind, e njëjtë sikur ishte për prokurorët specialë dhe gjyqtarët. E përsëris, ne nuk jemi kundër që kompensimet e tyre të mos paguhen, por kërkojmë shuma që u është paguar atyre muajin e kaluar, të na paguajnë edhe neve”, u shpreh Tërpe Dejanoski, Sekretar i Përgjithshëm i SPOGJ.

Në gjykata do të punohet vetëm në rastet e domosdoshme: lëndë urgjente , lëshime të certifikatave për të huaj ose për punësime.

“Nga nesër greva nga ora 11 deri në orën 12 do të jetë jashtë, ndërsa pas orës 12 do të vazhdojë brenda në një hapësirë ku do të jenë të gjithë. Nuk kemi pasur trysni. Dua të theksoj se kemi hasur në mirëkuptim nga ana e gjykatësve, madje ata edhe kanë shtyrë disa seanca të mbyllura“, tha Petre Nedelkovski, Kryetar i Organizatës sindikale të Gjykatës së Apelit.

Por më të nevrikosur gjatë ditës në gjykatën administrative ishin qytetarët të cilët në anketën e TV21 u shprehën.

“Gjykata kishte grevë, nuk punonin dhe na thanë se kemi grevë ”

“Mendoj se kishte grevë, për atë s’më pranuan”.

“Nuk po punojnë, më thanë se ka grevë kaq di unë”, u shprehën disa qytetarë.

Sindikata e punëtorëve gjyqësor thonë se veçmë kanë realizuar takim me ministrin e Drejtësisë dhe pritet të takohen me përfaqësues të Këshillit Gjyqësor me qëllim që të gjindet zgjidhje për kërkesën e tyre. Ndërkaq, nga Ministria e Drejtësisë thanë dje se kërkesat e pjesëtarëve të administratës gjyqësore janë plotësuar./Telegrafi/