Taravari: Do të punësohen 600 specializantë, 300 këtë vit dhe 300 vitin e ardhshëm

Deri në fund të vitit 1100 punonjës shëndetësor që janë me kontratë në vepër do të marrin vendime pune, tha ministri i Shëndetësisë Arben Taravari në seancën e sotme parlamentare, duke iu përgjigjur pyetjeve të deputetes së Frontit Evropian, Diana Toska. Ajo pyeti se pse janë shkarkuar drejtorët ekonomikë, nuk janë punësuar infermierë, edhe pse ka nevojë në institucionet shëndetësore.

Taravari thotë se problemet janë të trashëguara dhe se BDI në 22 vite pushtet nuk ka arritur të ndërtojë rrjetin e kanalizimeve në Zajaz dhe pret që për gjashtë muaj të ndërtojë një qendër klinike.

Ai shtoi se problemi me listën pozitive të barnave është tejkaluar.

“Do të punësohen 600 specializantë, 300 këtë vit, 300 vitin e ardhshëm”, tha Taravari.

Për drejtorët ekonomikë, Ministri tha se deputetja nuk ka reaguar në vitin 2017 kur ka qenë pjesë e Qeverisë dhe më pas e kanë shkarkuar.

Taravari i ka bërë thirrje Toskës që të pyet mjekët e BDI-së se çfarë është bërë në spitalin e Tetovës, Gostivar…/Telegrafi/