Sot fillon deklarimi i pasurisë së zyrtarëve të lartë publik

Sot, zyrtarisht fillon procesi i deklarimit të rregullt të pasurisë së zyrtarëve të lartë publik, të cilët janë të obliguar ta bëjnë deklarimin e pasurisë së tyre tek Agjencia kundër Korrupsionit komfor Ligjit për Deklarimin, Prejardhjen dhe Kontrollin e Pasurisë të Zyrtarëve të Lartë Publik.

Agjencia Antikorrupsion përmes një komunikate për media thotë se zyrtarët e lartë publik që kanë deklaruar pasurinë me marrjen e detyrës nga 1 janari i këtij viti e deri më tani nuk janë të obliguar të paraqesin edhe deklarimin e rregullt vjetor.

Për të shkarkuar Formularët për deklarimin e pasurisë, AKK rekomandon që të vizitohet ueb faqja zyrtare e tyre, www.akk-ks.org.

E në rast të mosrespektimit të ligjit për deklarimin e pasurisë AKK thotë se do të ushtrojë kallëzim penal.

“Gjithashtu ju rikujtojmë se mosrespektimi i ligjit nr. 04/L-050, si dhe ligjit nr. 04/L-228 për deklarimin e pasurisë nga ana e zyrtarëve të lartë publik, Agjencia kundër Korrupsionit do ushtroj kallëzim penal në pajtim me nenin 437 të Kodit Penal”, thuhet më tutje në komunikatën e AKK-së.

Sipas AKK-së deklarimi i pasurisë fillon nga data 1 mars dhe përfundon më 31 mars.