Shfaqje për tmerret e luftës në Kosovë: “Unë nuk jam një armë lufte”

Arti dëshmon edhe një herë fuqinë e tij të pakufishme në shpërndarjen e mesazheve universale.

Nga bulevardi “Bonne Nouvelle” në Paris, në gjimnazet e Brukselit, shfaqja teatrale “Unë nuk jam një armë lufte”, ku interpreton aktorja shqiptare Anila Dervishi, merr përsipër edhe njëherë misionin për të përcjellë dëshmitë e grave, viktima të luftës në Kosovë.

Përkujtimi i tmerrit të luftës, që në emër të spastrimit etnik, e vuajnë popujt e martirizuar, mbetet qëllimi kryesor i kësaj shfaqjeje.

Teksti është përshtatur sipas librit “Ditari i një gruaje nga Kosova”, i Sevdije Ahmetit, autore dhe aktiviste shqiptare për të drejtat e njeriut.

Një skenë minimaliste ku e bardha zë gjithë hapësirën, është përzgjedhja e skenaristit Zenel Laçi, si për të kundërpeshuar zymtësinë e tregimeve dhe tmerrit të dhunës.

Densiteti i të gjithave është i tillë që spektatori ndjehet në mënyrë të pashmangshme i prekur.

E shoqëruar nga Afrim Jahja (kitarist i grupit rok belg, The Witness), aktorja Anila Dervishi mban mbi supe peshën e tekstit tronditës.

Me një intensitet të lartë, Dervishi krijon interpretimin e saj me tonalitetet e zërit, me vështrimin dhe flokët e “shpupurisura”, duke marrë përsipër të çliroj fjalën dhe dhimbjen e të gjitha grave.

Shfaqja vjen aktuale edhe pse lufta në Kosovë ka përfunduar 19 vite më parë. Në 2018, në Siri, në Jemen, në Birmani, në Etiopi civilët janë viktimat e para të luftimeve, veçanërisht gratë.

Shfaqja ka gjetur jehonë në mediat franceze dhe belge. /ATSH/