Rreth dërgimit të trupave nga vendet perëndimore në Ukrainë deklarohet edhe Finlanda

Ministrja e Jashtme e Finlandës ka thënë se vendet perëndimore nuk duhet të kundërshtojnë plotësisht idenë e dërgimit të trupave në Ukrainë nëse situata atje përkeqësohet.

“Është e rëndësishme që të mos përjashtojmë gjithçka për një afat të gjatë, sepse nuk e dimë kurrë se sa serioze bëhet situata”, citohet të ketë thënë Elina Valtonen, shkruajnë mediat e huaja, përcjell Telegrafi.

“Por pozicioni finlandez është i qartë – ne nuk po dërgojmë tani trupa dhe nuk jemi të gatshëm ta diskutojmë këtë”.

Fjalët e saj vijnë një ditë pasi presidenti francez Emmanuel Macron refuzoi përsëri të përjashtonte mundësinë e dërgimit të trupave në Ukrainë.

Lexo po ashtu Të gjitha lajmet nga Kriza në Ukrainë

Ajo tregon se, pavarësisht se janë ende kundër dërgimit të trupave në Ukrainë, disa vende në rajonin më të gjerë – potencialisht në rrezik nga një Rusi e guximshme – mund ta konsiderojnë opsionin më seriozisht nëse gjërat përkeqësohen.

Ndryshe, presidenti amerikan Joe Biden ka thënë se nuk do të dërgojë trupa luftarake në Ukrainë.

Zëdhënësi i Këshillit të Sigurisë Kombëtare, John Kirby, tha të premten: “Unë thjesht mund të flas për këtë komb sovran dhe këtë komandant të përgjithshëm dhe ai e ka bërë të qartë se ne nuk do t’i vendosim çizmet e SHBA-së në atë tokë”.

Ai tha se SHBA nuk do të kundërshtojnë vendet e tjera që të dërgojnë forcat e tyre megjithatë, duke shtuar se ato do të jenë “vendime sovrane”.

Por zonja Valtonen tha se gjëja më e rëndësishme për përkrahësit e Ukrainës për të bërë në këtë moment ishte të vazhdonin të dërgonin ndihma të tjera.

“Shumë vende evropiane mund të bëjnë shumë më tepër”, ka vlerësuar ajo. /Telegrafi/