Pasi u shpall kampion i La Ligas për sezonin 2019/2020, Sergio Ramos e ka komentuar suksesin e Mbretërve dhe rrugëtimin e tyre drejt kësaj arritjeje, si edhe iu është përgjigjur disa pyetjeve të gazetarëve.
Ai është pyetur edhe për kohëzgjatjen e qëndrimit të tij te Los Blancos dhe ku e sheh të ardhmen.
“(Do të qëndroj) për aq sa presidenti dëshiron. Jam i gëzuar që ndodhem këtu dhe dua të pensionohem me këtë klub”.
(Foto: Denis Doyle/Getty Images/Guliver)
“Nuk besoj se do të ketë ndonjë problem nga cila do palë që mund ta pengojë të ndodhë kjo”, është shprehur më tej Ramos për Movistar+.
Qendërmbrojtësi spanjoll është pjesë e Real Madridi nga viti 2005, ndërsa e ka fituar pesë herë La Ligan, katër herë Ligën e Kampionëve, katër herë Kupën e Botës për Klube, dy herë Kupën e Mbretit, katër herë Superkupën e Spanjës dhe tri herë Superkupën e Evropës.
Florenitno Perez (Foto: Eric Alonso/Getty Images/Guliver)
Ndërsa Florentino Perez i ka qetësuar tifozët lidhur me situatën e kontratës së kapitenit, e cila skadon pas një viti dhe akoma nuk ka bisedime për rinovimin e saj.
“Ramos do të qëndrojë këtu gjithë jetën. Tifozët mund të qetësohen. Ai ka qenë një lider mbresëlënës. Skuadra është e lidhur dhe shumë prej kësaj është meritë e tij”, ka deklaruar kreu i Realit. /Telegrafi/
