PD kushtëzon zgjedhjet, Berisha e Topalli kundër bojkotit

Kur kanë mbetur 5 muaj nga dita e zgjedhjeve, Partia Demokratike ka nisur krijimin e koalicionit për votën e lirë.

Ky nuk është domosdoshmërisht një koalicion zgjedhor, por një koalicion për të ushtruar presion që qeveria të pranojë votimin dhe numërimin elektronik si kushtin kryesor për garantimin e votës së lirë dhe të ndershme.

Anëtari më i ri i këtij koalicioni është Vangjel Dule i PBDNJ-së, por kryetari i opozitës Lulzim Basha po këmbëngul në zgjerimin e tij.

Basha ftoi në koalicionin për votën e lirë çdo parti që do zgjedhje të lira e të ndershme duke vënë në dukje se çdo justifikim apo shmangje nga kjo çështje është kundër interesit të vendit.

Por si do të arrihet kjo? Tani për tani, opozita po e shmang opsionin e bojkotit parlamentar, edhe pse ky ishte një opsion i shumëdiskutuar në mbledhjen e grupit të deputetëve. Edmond Spaho, Arben Ristani, Genc Ruli dhe Flamur Noka ishin të linjës për të bojkotuar Parlamentin, për shtyrjen e zgjedhjeve dhe për protesta.

Por nga këto vetëm opsioni i protestave është mbështetur nga deputetët e tjerë, edhe pse Majlinda Bregu ka vënë në pikëpyetje aftësinë e strukturave për t’i organizuar protestat.

Kundër bojkotit ishte edhe Sali Berisha dhe Jozefina Topalli. Linja e tyre, siç tha Sali Berisha ishte mobilizimi i të gjithë potencialit të opozitës, përfshirë edhe betejën parlamentare, për realizimin e misionit për rikthimin e zgjedhjeve të lira.

Jozefina Topalli kërkoi mobilizimin e Partisë Demokratike për të bërë për vete të pakënaqurit, për të krijuar besim dhe optimizëm para zgjedhjeve.

Në këtë miksim qëndrimesh, për opozitën ka vetëm një gjë të qartë; mospjesëmarrja në zgjedhje nuk është një opsion dhe se gjithçka tjetër është e ndryshueshme.