Partia UNITETI mbështet protestat e sektorit civil dhe partive opozitare

Në një konferencë shtypi, kryetari i partisë UNITETI, Gëzim Ostreni, bëri të ditur se kjo parti mbështet protestat e sektorit civil dhe partive opozitare, transmeton Telegrafi Maqedoni.

Ai tha se ky proces është kundër koalicionit qeveritar, VMRO-DPMNE – BDI, dhe se nuk është një proces në mes të shqiptarëve dhe maqedonasve.

“Kërkesa për tërheqjen e vendimit të kryetarit të shtetit për faljen që bëri, insistimi për prononcim të Gjykatës Kushtetuese për kushtetutshmërinë e Prokurorisë Speciale, kërkesa për formimin e departamentit special të Gjykatës për vepra kriminale, kërkesa për tërheqjen e vendimit për zgjedhje parlamentare më 5 qeshor dhe formimi i Qeverisë teknike-kalimtare nuk janë kërkesa kombëtare, por qytetare”, tha kryetari i UNITETI-t, Gëzim Ostreni.

Më tej, ostreni theksoi se: “UNITETI beson se mbështetja dhe pjesëmarrja e organizuar e kërkesave të shprehura nga shoqëria civile dhe realizimi i tyre, do ta bëjnë të mundur edhe realizimin e kërkesave të parashtruara nga uniteti në formë të iniciativës qytetare për ndryshime në Kushtetutë dhe ligje për demokratizimin e mëtutjeshëm të RM-së, për të drejtat themelore të shqiptarëve, për barazi të plotë të bashkësive etnike dhe qytetarëve në vend”./Telegrafi/