Në librin “Ngritja e një shteti”, Hoxhaj ironizon me Vuçiqin dhe Daçiqin

Libri i ministrit të Jashtëm të Kosovës, Enver Hoxhaj, “Ngritja e një shteti”, ka arritur sot edhe në panairin e librit në Prishtinë.

Libri që flet për Kosovën dhe politikën e saj të jashtme, pritet të zgjojë interesim për temat e ndjeshme që ka trajtuar, si raporti me Serbinë, dialogu dhe përshkrimi cinik që Hoxhaj ua ka bërë dy prej personazheve kryesore politike të Serbisë: kryeministrit Aleksandër Vuçiq dhe zëvendësit të tij, Ivicia Daçiq.

Në një kapitull të veçantë, “Marrëdhëniet e vështira me Serbinë”, Hoxhaj flet për elementet që duhet të përmbajë Traktati i Paqes.

“Serbia të marrë obligime që nuk do të ketë aspirate territoriale ndaj Kosovës; nuk do të ndërhyjë në punët e brendshme të saj; si dhe do të jetë e vendosur për ndërtimin e fqinjësisë së mirë para dhe pas anëtarësimit në BE. Ajo duhet të jetë në favor të anëtarësimit të Kosovës në OKB”, shkruan Hoxhaj, duke ofruar edhe një listë të gjatë të hapave.

Por, një pjesë interesante e këtij kapitulli është përshkrimi cinik dhe deri-diku përçmues që ua bënë krerëve të shtetit serb.

“Mënyra e tregimit të barsoletave të Ivica Daçiqit, madhësia e kostumeve në raport me trupin dhe gjuha e trupit, ishte trashëgimi e qartë e një kohe të kaluar. Mirëpo, njeriu vendimmarrës gjatë dialogut do të jetë Aleksandër Vuçiq, kryeministër i ardhshëm i Serbisë. Dikur një ministër i Vojisllav Sheshelit, e më vonë një njeri ambicioz, autoritar dhe politikisht i fuqishëm. Ai do ta shtyjë me një ndjeshmëri graduale përpara normalizimin si proces, por është shfaqur sa arrogant në dialog, po aq edhe psikikisht i pasigurt”, ka shkruar Hoxhaj. /Telegrafi/