Mit apo fakt: A rriten qimet më të trasha nga brisku?

Nëse ke përdorur briskun të paktën një herë në jetë, me siguri ke dëgjuar frazën klasike: “Mos i rruaj qimet, se do të dalin më të trasha!”

Ky është një nga mitet më të përhapura rreth heqjes së qimeve, por a është vërtet e bazuar në fakte shkencore?

Çfarë thotë shkenca?

Kur rruajmë qimet me brisk, ato priten në nivelin e lëkurës, duke krijuar një majë të prerë drejt. Kjo bën që, kur rriten, të ndihen më të trasha dhe më të ashpra në prekje. Megjithatë, kjo nuk do të thotë që qimet në të vërtetë ndryshojnë në trashësi apo densitet.

Rruajtja nuk ndikon në numrin e qimeve, shpejtësinë e rritjes apo trashësinë e tyre. Çdo qime ka një formë natyrale që përcaktohet nga gjeni, dhe brisku nuk e ndryshon këtë, shkruan Healthline.

Pse qimet duken më të trasha?

Ka disa arsye pse pas rruajtjes mund të krijohet iluzioni se qimet po rriten më të forta:

• Prerja e drejtë: Majat e qimeve të sapo dalura janë më të trasha në bazë dhe nuk janë të holluara si qimet që bien natyrshëm.

• Ngjyra: Qimet e reja nuk janë ekspozuar ende ndaj diellit dhe faktorëve të jashtëm, ndaj duken më të errëta.

• Prekja: Meqë maja e qimes nuk është e holluar natyrshëm, preket më lehtë dhe krijon ndjesinë e ashpërsisë.

Po metodat e tjera?

Nëse dëshiron që qimet të duken më të holla apo të rriten më ngadalë, mund të provosh metoda si dylli, depilimi me laser apo kremrat depilues, të cilët heqin qimen nga rrënja dhe e bëjnë rritjen më të butë.

Mit! Brisku nuk i bën qimet më të trasha, thjesht i bën të duken dhe të ndihen ashtu. Nëse preferon një metodë të shpejtë dhe pa dhimbje për heqjen e qimeve, mos e vrit mendjen – përdore briskun pa frikë! /Telegrafi/