Maqedoni: Pushteti dhe opozita me qëndrime të ndryshme për rritjen e akcizës së derivateve të naftës

Qeveria e rriti çmimin e akcizës së derivateve të naftës për tre denarë si masë për menaxhim me krizën e shkaktuar nga virusi korona. Mjetet nga rritja e akcizës do të shkojnë në Fondin për Menaxhim me virusin korona për financimin e masave për mbështetje të ekonomisë dhe masave të drejtuara kah qytetarët.

Nga Qeveria dje sqaruan se dekreti i tillë është sjellë që të zbuten pasojat ekonomike nga shpenzimet rritura për menaxhim me virusin korona dhe për sigurimin e mjeteve për servisim të rregullt të nevojave buxhetore.

Zëdhënësi i Qeverisë, Muhamet Hoxha në konferencën për media theksoi se rritja e vlerës së akcizës nuk do të shkaktojë implikime financiare shtesë për kompanitë dhe për popullatën.

“Duke pasur parasysh se kemi rënie të çmimit të naftës prej rreth 20 denarë në periudhën prej 1 janarit deri më 6 prill të këtij viti kemi kushte për të ndërmarrë një masë të tillë, gjegjësisht rritjen e akcizës së derivateve të naftës si masë antikrize në luftën kundër virusit korona”, tha Hoxha.

Rritja e akcizës së naftës, siç theksuan nga Qeveria, është sjellë pas konsultimeve paraprake me ekspertë të të gjitha palëve të prekura.

Për opozitën, rritja e tillë e akcizës është grabitje e pastër e qytetarëve. Kjo, vlerësuan dje nga opozita, është mënyrë se si Qeveria do të marrë para nga qytetarët që ta mbulojë vrimën financiare që është bërë në Buxhet.

“Çmimin e ulët të naftës në bursat botërore, pushteti i LSDM-së e përdor për sigurimin e fitimeve të mëdha të individëve në dëm të popullatës së varfër”, tha në konferencën për media nënkryetari i OBRM-PDUKM-së, Vllado Misajllovski.

Kompania “Makpetrol, e cila udhëheq me derivatet e naftës përmes një kumtese shprehu mbështetje për vendimin e Qeverisë, por prej atje kërkuan sqarim që tregojnë analizat për propozimin për rritjen dhe barazimin e akcizës së vajit ekstra të lehtë dhe dizelit.

Efektet nga propozimi i tillë, sipas Qeverisë, do të ishin gati se kurrfarë.

“Vaji ekstra i lehtë është i dedikuar vetëm për përdorim të kufizuar dhe ligjërisht është e ndaluar për shitje prej 15 prillit, efekte nga masa e tillë do të ishte gati se kurrfarë”, tha zëdhënësi qeveritar në konferencën e djeshme për media.