Lëvrohen 3.5 milionë euro për restaurimin e qendrave kulturore

Ministria e Turizmit, Kulturës, Rinisë dhe Sporteve ka fituar një fond prej 3.5 milionë eurosh për restaurimin e disa kalave dhe pikave monumentale, si ajo e Lezhës, Elbasanit, Shkodrës e shumë qyteteve të tjera, ku janë pikasur qendra të tilla më vlera të rralla për kulturën kombëtare.

Ky fond është lëvruar nga programi “CARDS” me qendër në komunitetin evropian.

Iris Pojani, drejtoreshë për turizmin dhe zhvillimin e kulturës kombëtare në MTKRS, shpjegon se ka filluar puna për restaurimin e disa qendrave kulturore, që përbejnë interes për turizmin vendas.

Në qytetin e Gjirokastrës është ngritur Zyra e Administrimit dhe Koordinimit të qendrës historike të këtij qyteti.

Presupozohet që kjo zyrë të jetë një njësi menaxhuese, në drejtim të thithjes së fondeve nga të huajt, zbatimin e tyre, administrimin e qendrës historike në pikëpamjen e vizitorëve vendas dhe të huaj dhe një sërë synimesh të tjera.

“Brenda këtij viti do të lëvrohen nga UNESCO fondi prej 1.367.000 dollarësh, me qëllim restaurimin e pazarit të Gjirokastrës. Po kështu ka filluar edhe restaurimi i hanit të Zagorisë, me një fond prej 24 milionë dollarësh”.

Sërish nga UNESCO është miratuar fondi prej 91.000 dollarësh për mbrojtjen e isopolifonisë shqiptare. Një tërheqje kjo për kulturën e popullit tonë, e mbetur edhe ndër ato të pakta gjëra me të cilat identifikohemi në sytë e të huajve.

“Vendosja e sinjalistikës dygjuhëshe në monumentet e kulturës të bregdetit jugor, tashmë mund të cilësohet si një sukses. Gjithçka është vendosur sipas parametrave bashkëkohorë”, shprehet Pojani.

Aktualisht është duke u restauruar Lidhja e Shkrimtarëve, restaurim që shkon deri në fazën e tretë të punimeve dhe që synon përshtatjen e këtyre ambienteve për akomodimin e administratës së MTKRS-së.

Ndërsa ende nuk është konfirmuar lëvrimi i fondit prej 8 milionë lekësh për restaurimin e bibliotekës së vjetër. /Korrieri/