Haradinaj: Do ta largojmë ndikimin e Serbisë nga Kosova

Kandidati për kryeministër nga koalicioni PDK-AAK-Nisma, Ramush Haradinaj, në takim me qytetarët e Gjilanit tha se me ardhjen e tij në Qeveri do ta largojë ndikimin e Serbisë nga Kosova.

“Problemi i parë i Kosovës dhe Qeverisë është me largu, mos me leju influencën e Serbisë, që si qëllim ka me të pengu, me të vonu, me të ndal. Dhe do ta bëjmë këtë. Po vjen koha, e kjo e ka dhe një rëndësi të madhe. S’kemi me mujt me u anku, se po na pengon Serbia. Ka me ardh një ditë me pa veç vet a jemi në rregull. Qysh po qeverisim ne vet. Kjo është bukur serioze. Do ta heqim ndikimin e tyre”, tha Haradinaj.

Sipas tij e vetmja zgjidhje për qytetarët më 11 qershor është koalicioni PDK-AAK –Nisma

“Me të 11 kemi me zgjedh një Qeveri LDK,  e një kryeministri të shkarkuar. I shkarkuar dhe prej kryeqytetit. Nuk mendoj se është perspektiva jonë. Po ashtu keni me zgjedh eksperiment potencial, ata që nuk dëshmuan që kuptojnë seriozitetin e shtetit. Zgjidhja jonë në këtë etapë, Qeveria jonë është në numrin 12”, tha kandidati për kryeministër nga PDK-AAK-Nisma.

Ahmet Isufi, nënkryetar i AAK, tha se ka ardhur koha që Kosova ta bëjë kthesën dhe koha është që me njerëzit të cilët kanë bërë ndryshime.

“Ka ardhur koha për një zhvillim dhe prosperitet. Kanë kaluar 18 vjet që nga përfundimi i luftës, por Kosova nuk është ajo që e dëshiruan brezat tanë”, tha ai.

Magbule Shkodra, kryetare e forumit të grave në AAK, është shprehur e bindur se Ramush Haradinaj do të qeverisë me vendin pas 11 qershorit.

“Më 12 qershor është dita e fitores tonë. Anamorava dhe gjithë Kosova nuk do të harrohet nga kryeministri jonë”, ka thënë Shkodra.

Ndërsa Halil Matoshi, i cili kohë më parë aderoi në AAK, tha se sot është kthyer në shtëpinë e tij.

“Unë në vitet e 90-ta i kam besuar Rugovës, tash i besoj Ramush Haradinajt. Së bashku do ta bëjmë një shtet modern”, ka thënë ai.

Rexhep Kadriu, kryetar i Degës së AAK-së në Gjilan, tha se qytetarët e Kosovës janë dëshmitarë të një regresi dhe një tuneli të pa dritë.

“Jemi dëshmitarë se jemi pa arsim cilësor dhe pa zhvillim ekonomik. Haradinaj të gjitha këto synon t’i zhvillojë”, ka thënë Kadriu. /kp/