Grabitje në Gjilan, dy persona me sprej e maska ia marrin viktimës 100 mijë euro

Policia e Kosovës ka bërë të ditur se sot ka ndodhur një rast i grabitjes në Gjilan, ku dy persona të maskuar duke përdorur sprej kanë arritur që viktimës, shtetas i Kosovës t’ia grabisin një çante në cilën kishte një shumë të konsiderueshme të parave.

Në njoftimin e Policisë thuhet se të dyshuarit pas grabitjes janë larguar në drejtim të panjohur.

Rasti ka ndodhur në ora 08:45 në rrugën “Idriz Seferi” në Gjilan.

Ndërkaq, Kallxo.com mëson se bëhet fjalë për grabitjen e 100 mijë eurove, të cilat 60 vjeçari po i mbante në një çantë e të cilat po i dërgonte në këmbimore. Viktima rreth moshës 60 vjeç, në polici ka deklaruar se ka në pronësi një këmbimore dhe paratë ishte duke i dërguar aty.

E Policia e Kosovës për rajonin e Gjilanit njofton se në lidhje me rastin është njoftuar Prokurori i Shtetit i cili rastin e ka cilësuar “Grabitje”.

Të dyshuarit janë vënë në kërkim nga Policia e Kosovës, ndërsa rrethanat e rasti po hetohen nga hetues policor rajonal në Gjilan. /Telegrafi/