Fotot e rreme të vajzave të reja të zhveshura – të krijuara me Inteligjencën Artificiale – tronditin një qytet të vogël spanjoll

Një qytet i vogël në Spanjën jugore është tronditur nga shpërndarja e imazheve të vajzave të reja të krijuara nga Inteligjenca Artificiale në disa shkolla.

Imazhet, të cilat janë marrë kryesisht nga llogaritë e mediave sociale të vajzave dhe i kishin treguar ato të veshura plotësisht, u përhapën në të paktën katër nga pesë shkollat e mesme të Almendralejo, raportoi El País, përcjell Telegrafi.

Fotot u përpunuan nga një aplikacion i inteligjencës artificiale që krijoi imazhe të reja false që shfaqnin vajzat të zhveshura, sipas raportit.

Kështu, thuhet se më shumë se 20 vajza të moshës 11 deri në 17 vjeç janë identifikuar si viktima në qytet, në rajonin perëndimor spanjoll të Extremadura.

Historia doli në dritë pasi Miriam Al Adib, një mjeke dhe nënë e një prej vajzave të prekura, përdori profilin e saj të shquar në rrjetet sociale për të tërhequr vëmendjen ndaj incidentit. /Telegrafi/