Elon Musk nuk do të paguhet nëse ‘Tesla’ nuk përmbush objektivat

‘Tesla’ të martën njoftoi se Elon Musk do të qëndrojë si drejtues i kompanisë edhe për dekadën e ardhshme. Njoftimi përfundoi shumë spekulime nëse ai do të vazhdojë të shërbejë si Kryeshef Ekzekutiv edhe pas dy viteve të ardhshme, shkruan Telegrafi.

Në vitin 2013, ai tha se donte ta drejtonte kompaninë deri në lansimin e ‘Model 3’, një veturë që supozohej të ishte më e volitshme se modelet e kaluara por që është prodhuar me një sasi të kufizuar. Në vitin 2014, Musk tregoi se donte të qëndronte për të paktën katër ose pesë vjet.

Por njoftimi i së martës ngriti shumë pyetje për planin e tij të pazakontë dhe ambicioz të kompensimit.

“Eloni nuk do të marrë kompensim të çfarëdo lloji të garantuar – pa rrogë, pa shpërblim me para të gatshme. Ai do të kompensohet vetëm nëse ‘Tesla’ dhe të gjithë aksionarët e saj arrijnë rezultate të jashtëzakonshme”, thuhet në njoftim.

Andrew Ross Sorkin shkruan në pjesën e tij të ‘The New York Times’ se “plani i kompensimit të Muskut nuk është iluzion. Është e pamundur që ai të manipulojë sistemin duke u përpjekur të përkrah çmimin e aksioneve për një periudhë të përkohshme”.

Musk nuk do të paguhet për punën e tij, përveç nëse ‘Tesla’ arrin kapitalin më të lartë të tregut dhe momenteve operative të të ardhurave operacionale. Kompania aktualisht ka një kapital të tregut prej 59 miliardë dollarësh. Marrëveshja e Muskut e kompenson atë për çdo rritje prej 50 miliardë dollarësh në kapitalin e tregut, duke filluar me 100 miliardë dollarë dhe duke arritur në 650 miliardë dollarë. /Telegrafi/