Dubrovniku është vend mahnitës, dhe ofron shumëçka për turistët. Me lokacion mes Adriatikut dhe Alpeve Dinarike, brigjet e veta të Adriatikut janë mbresëlënëse; Qyteti i Vjetër i Dubrovnikut është sharmant dhe ia vlen të eksplorohet; plus, qyteti nuk është vend shumë i kushtueshëm për shumicën e turistëve, që do të thotë se për tri ditë mund të kaloni tejet mirë.
Bëhuni gati të futeni në parajsën evropiane – të rrethuar me ishuj të shumtë dhe atraksione të panumërta për të gjitha grupmoshat – dhe nëse mundeni, qëndroni më gjatë për ta shijuar edhe më shumë këtë vend magjik, transmeton Telegrafi.
DITA E PARË
Në mëngjesin e ditës së parë vizitojeni Portin e Qytetit, i cili është vend i mrekullueshëm për ta shijuar ecjen e mëngjesit dhe për të shkrepur disa fotografi në peizazhin piktoresk.
Pastaj, nisuni për në Qytetin e Vjetër – vend që domosdoshmërish duhet të vizitohet nga të gjithë turistët! Me kishat dhe ndërtesat e vjetra, muret e qytetit, korridoret, muzetë dhe numrin e madh të restoranteve dhe dyqaneve të suvenireve, shumë lehtë mund t’i shpenzoni orët varësisht nga koha dhe interesat tuaja.
Gjatë kohës kur jeni në Qytetin e Vjetër, domosdoshmërish vizitoni Muret e Qytetit Antik, të cilat ofrojnë pamje magjepsëse mbi detin Adriatik. Me kullat e vogla në shumicën e këndeve, dhe gjurmët e historisë në çdo hap që e bëni, normalisht se ia vlen të shëtiteni këtu dhe të bëni shumë fotografi. Asnjë vizitë në Dubrovnik nuk është e kompletuar pa i parë Muret e Qytetit Antik.
Kalaja Minceta është pika më e lartë e Mureve të Qytetit, ndërsa përfshihet në biletën që e blini. Ia vlen të ngjiteni në shkallët e pafundme deri në maje, ku do ta gjeni veten në pamjen më të bukur të Dubrovnikut dhe ishujve që e rrethojnë. Mos harroni të merrni ujë kur filloni t’i ngjitni shkallët.Për ta shijuar edhe më mirë pamjen antike të Dubrovnikut, mund të paguani një kosto të caktuar për t’u shëtitur me teleferikun ‘Dubrovnik Cable Car’ , i cili është i përshtatshëm për të gjitha grupmoshat.
E dedikuar për shenjtorin mbrojtës të qytetit, dhe e ndërtuar në vitin 1715, arkitektura e Kishës Shën Blaise është tejet e rrallë dhe të lë pa frymë. E gjendur në zemër të Qytetit të Vjetër, ky vend është atraksion i vërtetë turistik dhe ndoshta ndërtesa më e bukur në sheshin Luza.
Respektojeni kishën duke i mbuluar shpatullat dhe duke mos folur me zë të lartë.
Gjithashtu me lokacion brenda Qytetit të Vjetër, edhe muzeu “War Photo Limited” është një domosdoshmëri për ata të cilët e kuptojnë mirë historinë e konfliktit në Dubrovnik gjatë ndarjes së ish- Jugosllavisë. I ka dy kate të mbushura me fotografi, media dhe printime të cilat i shfaqin më së miri efektet e luftës në këtë qytet.
Shatërvanin Onophrian, të ndërtuar nga Onforio della Cava në sheshin ‘Pile Gate’ dhe një tjetër në sheshin Luza, duhet ta vizitoni sepse i përket mesit të shekullit 15’të, pra është një kryevepër historike dhe e përsosur për ta freskuar veten gjatë një dite të nxehtë të verës.
Afër shatërvanit e keni edhe Manastirin Franciscan, në fillim të Stradunit kah ana e majtë. Kur të keni nevojë të largoheni nga turma dhe rruga kryesore për një kohë, vizitojeni këtë manastir për ta shijuar arkitekturën e bukur dhe skulpturat e detajuara.
DITA E DYTË
Ditën e dytë fillojeni duke e vizituar Parkun Nacional Mljet, i cili është ishull i tetë për nga madhësia në Kroaci, dhe i kompletuar me peizazhe të bukura, det me ujë të pastër, liqene, dhe një trashëgimi interesante kulturore.
Në mesditën e ditës së dytë, vizitojeni ishullin Lokrum, i cili gjendet vetëm 700 metra larg portit të Dubrovnikut, para Qytetit të Vjetër. Ishulli është i mbushur me histori dhe gjëja më e mirë është se anijet taksi ju transportojnë aty për 10 minuta!
Kur jeni në Lokrum, vizitojeni manastirin e bukur Benedictine, i cili është ndërtuar në vitin 1023.
Ndër tjerash, ditën e dytë në Dubrovnik mund ta përfundoni në ishullin Korcula, i cili përmban shumë plazhe dhe kafe në breg të diellit. Rrugët janë të ndërtuara me kalldrëme, ndërsa vendasit janë tejet miqësorë.
DITA E TRETË
Për ata që u pëlqejnë sportet ekstreme, mund ta kënaqin veten në ‘Adventure Dalmatia’. Këtu mund të shijojnë të gjitha sportet e mundshme aventureske.
Por, ditën e fundit mund ta kaloni edhe duke u relaksuar, e relaksimin mund ta gjeni në ‘Skar Winery’ e cila është e ndërtuar në shekullin e 17’të dhe i prodhon verërat më kualitative në Kroaci.
Dhe natën e fundit kalojeni në ‘Cafe Buza’, për ta shijuar në maksimum perëndimin e diellit mbi qytet dhe atmosferën dashamire të kësaj kafe. /Telegrafi/
