Një vajzë që kishte veshur një bluzë ngjyrë rozë, kishte mbetur nën rrënojat e objekteve të bombarduara nga sulmet ajrore në veriperëndim të Sirisë, shkruan CNN.
“Kush është mami im”, dëgjohet duke thënë 9-vjeçarja Islam Habra, zëri i të cilës mezi dilte nga frika dhe lotët që i rridhnin nëpër faqe, transmeton Telegrafi.
Por ishin anëtarët e mbrojtjes civile siriane të njohur ndryshe si helmetat e bardha, që mundoheshin ta nxjerrin nga rrënojat edhe pse vazhdimisht kishte sulme ajrore dhe shpërthime pak metra larg saj.
Ndërkaq e ëma e Habra kishte mbetur e vdekur kur një aeroplan luftarak bombardoi shtëpinë. Në atë sulm kishin humbur jetën edhe dy fëmijët e saj të tjerë.
Operacioni për shpëtimin e Habras është filmuar dhe publikuar në rrjetet sociale nga helmetat e bardha, dhe derisa ata po tentonin ta nxirrnin sulmet ajrore ndodhnin.
“Nuk mund ta lija vajzën”, ka deklaruar Abdullah nga helmetat e bardha për CNN, duke shtuar se ”derisa mundohesh të shpëtosh dikë, duhet vazhdimisht të flasësh me të”.
Abdullah pranoi se nuk kishte mundur t’i tregojë vogëlushes se ëma e saj ishte vrarë në sulmet ajrore, përkundrazi mundohej ta bënte të harroj momentet e vështira derisa po tentonte ta nxirrte nga rrënojat. /Telegrafi/
