Dauti: Dalja e Britanisë nga Unioni Evropian do të ketë pasoja në Ballkan

Publicisti Daut Dauti, në Info Magazine të Klan Kosovës ka thënë se vendimi i britanikëve për të dalë nga Bashkimi Evropian nuk ka qenë i pritur.

Ai ka deklaruar se dalja do të jetë e rëndë për Britaninë, ndërsa pret që me zvarritjen e procedurave të mund të ndryshohet vendimi i dalë nga Referendumi.

“Rezultati ka shkaktuar befasi, pasi askush në Britani të Madhe nuk ka pritur rezultat të tillë (ani pse sondazhet kanë bërë të ditur se ekziston mundësia që të votohet dalja nga Bashkimi Evropian). Vendimi llogaritet si i pamatur, i përkrahur nga njerëz që nuk kanë fort ide për BE-në. Nuk besoj që Britania ka përjetuar ditë më të vështira politike se kjo. Me zvarritjen e procedurave, besohet se mund të taktizohet dhe të ndryshohet diçka”, ka thënë ai.

Dauti shprehet se dalja nga Unioni ka qenë ide dhe kërkesë e vjetër e konservatorëve.

“Ata vazhdimisht kanë tentuar ta sqarojnë integrimin në Union si humbje të sovranitetit. Brenda këtij grupi ka ekzistuar një presion i vazhdueshëm që kryeministri David Cameron ta shtyjë përpara referendumin, gjë që e pati premtuar në fushatën zgjedhore. Kjo gjë edhe ndodhi dhe Britania është duke përjetuar ditë të vështirë”, ka thënë Dauti. “Pasojat e para janë vërejtur sot në mëngjes nga humbja e vlerës së funtës, e cila ka rënë në raport me të tjerat për 10 për qind. Pasojat vërehen edhe në aspektin e bizneseve, ndërsa në aspektin politik ato kanë nisur të vërehen në Skoci, shtet që ka votuar për të mbetur në BE dhe që tani e do pavarësinë për ta realizuar”.

Më tutje ai ka theksuar se edhe Ballkani do të goditet nga kjo dalje, pasi raportet e tij me Britaninë kanë qenë shumë të afërta, njofton Klan Kosova.

“Ballkani do të provojë reflektimet e daljes së Britanisë nga BE-ja, për shkak të rëndësisë që ka pasur në çështje të ndryshme të lidhura me të”, u shpreh Dauti. /Klan Kosova/