Cila është zgjidhja për të nisur gjykimi në mungesë ndaj Radoiçiqit

Aktakuza e ngritur nga Prokuroria Speciale e Kosovës, në mungesë ndaj Milan Radoiçiqit, e 41 të tjerëve, vazhdon të mbes vetëm në letër. Kjo pasi ende nuk dihet nëse do të nis gjykimi ndaj tyre. Avokatët thonë se Prokuroria Speciale do të duhej të ndryshonte aktakuzën për ta në mënyre që të vazhdohej me procesin gjyqësor.

Më shumë se katër muaj kanë kaluar nga ngritja e aktakuzës, ndaj Milan Radoiçiqit dhe 44 personave të tjerë, për sulmin terrorist në Banjskë të Zveçanit.

Ndonëse gjykimi nisi për tre prej të akuzuarve, për 42 të tjerët, përfshirë edhe Radoiçiqin ende nuk dihet se si do të vazhdohet meqë të njëjtit ishin të pakapshëm për sistemin e drejtësisë në Kosovë.

Nga Gjykata Themelore në Prishtinë, nuk treguan nëse kanë vendosur se si do të vazhdohet me këtë, ndërkohë që avokati i familjes së policit të vrarë në këtë sulm, thotë se ky rast duhet të trajtohet me prioritet.

“Kjo është një lëndë e rëndësisë së veçantë është rrezikuar rendi kushtetues i Kosovës, prandaj besoj se duhet me i dhënë prioritet në trajtimin e saj dhe në nisjen e gjykimit… Unë jam i përgatitur për të dy opsionet pra si me gjykim në mungesë sikurse në versionin tjetër, unë nuk e kam problem le të vendos gjykata tutje”, ka theksuar për Tv Dukagjinin, Arianit Koci – avokat i familjes Bunjaku.

Ndërkohë që sipas Naim Rudarit, avokat i njërit zyrtari policor që është plagosur më 24 shtator, thotë se prokuroria Speciale mund ti jap zgjidhje kësaj çështje.

“Gjykata pa asnjë mëdyshje do të mund të fillonte me gjykimin në mungesë, apo në anën tjetër do të mund ti kërkonte prokurorisë që ta ndryshonte aktakuzën, dhe prokuroria speciale me një ndryshim, fare kozmetik mund ta ndryshonte aktakuzën dhe të fillonte gjykimi në mungesë, pa lënë fare mëdyshje”, ka deklaruar ai.

Nga Prokuroria Speciale nuk kanë kthyer përgjigje nëse aktakuza ndaj Milan Radoiçiqit, dhe të tjerëve që është ngritur në mungesë, mund të ndryshohet.

Në seancën fillestare të mbajtur në tetor të viti të kaluar, Blagoje Spasojeviq, Vladimir Toliq dhe Dushan Maksimoviq nuk pranuan fajësinë, derisa vazhdojnë të jenë nën masën e paraburgimit.