Brukseli do të vëzhgojë nëse Musk shkel ligjin e BE-së në transmetim të drejtpërdrejtë me lideren gjermane të së djathtës ekstreme

Kur gjiganti i teknologjisë Elon Musk interviston lideren gjermane të ekstremit të djathtë Alice Weidel në X të enjten mbrëma, rregullatorët e fuqishëm të teknologjisë evropiane do të vëzhgojnë nga afër për shkelje të mundshme të ligjit të BE-së.

Ata do të jenë më pak të shqetësuar me shakatë sesa me mënyrën se si platforma dhe algoritmi në pronësi të Musk, e shtyn transmetimin e drejtpërdrejtë te më shumë se 100 milionë përdoruesit e BE-së.

Në veçanti, ata do të vlerësojnë nëse X i jep një avantazh të padrejtë fushatës partisë Alternativa për Gjermaninë (AfD) të Weidel ndaj rivalëve të saj, transmeton Telegrafi.

Intervista online e Musk vjen vetëm disa javë përpara zgjedhjeve të përgjithshme të Gjermanisë më 23 shkurt, me AfD-në kundër imigracionit aktualisht në vend të dytë. Musk së fundmi vlerësoi grupin si “shkëndijën e fundit të shpresës” për Gjermaninë, duke tërhequr akuza të gjera për ndërhyrje në zgjedhje.

Një ekip prej deri në 150 zyrtarë të Komisionit Evropian në Bruksel do të ndihmojë në shqyrtimin, nëse faqja e rrjeteve sociale të Musk zbaton rregullat e teknologjisë së Bashkimit Evropian.

Ata kanë fuqi të gjera hetimore që i lejojnë ata të vizitojnë zyrat e X, dhe të kërkojnë qasje në algoritmin e tij dhe korrespondencën e brendshme.

Zbatuesit me bazë në Bruksel të Aktit të Shërbimeve Digjitale (DSA) në departamentin e teknologjisë së DG CONNECT të Komisionit, ndihmohen nga ekspertë nga Qendra Evropiane për Transparencën Algoritmike në Spanjë.

Provat e mbledhura të enjten në mbrëmje mund të forcojnë çështjen historike të BE-së kundër X nën DSA. Blloku akuzoi zyrtarisht platformën e Musk për dështimin në respektimin e rregullave të BE-së në korrik dhe po finalizon vendimin e tij – një vendim i parë në llojin e tij sipas ligjit të teknologjisë.

Sidoqoftë, mos prisni një rezultat deri të premten në mëngjes. Afati kohor është i rrjedhshëm dhe gjobimi i X ka të ngjarë të shkaktojë një luftë diplomatike me administratën e ardhshme amerikane të Donald Trump, i cili ka marrë Musk si një këshilltar të ngushtë.

Në fund të fundit, çdo vendim nëse do të veprohet do të merret në nivel politik, në krye të Komisionit.

Henna Virkkunen dhe kolegu i saj Michael McGrath u thanë ligjvënësve në një letër këtë javë, se Komisioni planifikon të “përparojë energjikisht me çështjen” dhe “të arrijë në një përfundim sa më shpejt që të jetë e mundur ligjërisht”.

Komisioni nuk ka vendosur ende asnjë nga dënimet e tij të mundshme DSA. Gjobat mund të shkojnë deri në 6 për qind të të ardhurave vjetore globale, dhe rregullatorët mund të urdhërojnë firmat që shkelin të marrin masa për të ndaluar çdo problem. Zyrtarët gjithashtu mund të vënë një kompani në vëzhgim, nëpërmjet “një periudhe të zgjeruar mbikëqyrjeje për të siguruar pajtueshmërinë” dhe të lëshojnë gjoba ditore derisa të binden.

Zbatuesit digjitalë të BE-së kanë thënë tashmë se fokusi i tyre është nëse Musk e përkul algoritmin X në favor të tij, si për shembull duke rritur përmbajtjen e tij ose potencialisht duke i dhënë udhëheqëses së AfD një platformë më të madhe dhe duke ulur përmbajtjen nga rivalët e saj.

Të bësh këtë do të konsiderohej një avantazh i padrejtë, dhe mund të shihet si shkelje e ligjit të BE-së për mediat sociale.

“Sa është [ajo] apo do të rritet? Kjo është ajo që Komisioni do të shikojë”, u tha gazetarëve të hënën zëdhënësi i Komisionit Thomas Regnier. /Telegrafi/