Bombardimet e NATO-s ndaj Serbisë, liderët opozitarë: Gjunjëzuan kasapin e Ballkanit dhe aparatin e tij kriminal

Liderët e partive opozitare në vend kanë përkujtuar 24 vjetorin e fillimit të bombardimeve të NATO-së mbi caqet serbe.

Kryetari i Partisë Demokratike të Kosovës (PDK), Memli Krasniqi ka thënë se NATO për 78 ditë gjunjëzoi kasapin e Ballkanit, Sllobodan Millosheviq dhe aparatin e tij kriminal.

“Sot shënojmë 24 vjetorin e fillimit të bombardimeve të NATO-s mbi caqet serbe në Kosovë dhe Serbi, të cilat, për 78 ditë gjunjëzuan kasapin e Ballkanit, Sllobodan Millosheviç dhe aparatin e tij kriminal”, ka thënë Krasniqi.

Ai po ashtu u shpreh se kjo ndërhyrje, e cila erdhi si rrjedhojë e përpjekjeve, kërkesës dhe rezistencës së popullit për liri.

“Përfshirë luftën e drejtë dhe të guximshme të UÇK-së, i dha fund një regjimi gjenocidal duke hapur epokën e ëndërruar të lirisë për ne.

Ky kapitull, kjo shpresë e re, ndihmoi çlirimin, pavarësinë dhe krijimin e shtetit tonë. Prandaj, u jemi përjetësisht mirënjohës aleatëve tanë ndërkombëtarë, shteteve anëtare të NATO-s, të cilat 24 vite më parë realizuan këtë mision fisnik dhe humanitar.

Faleminderit – dje, sot, nesër, përgjithmonë! “, ka shkruar Krasniqi.

Edhe lideri i AAK-së, Ramush Haradinaj nga Gllogjani tha se përmbyllja me sukses e luftës ishte një vit më vonë, nga bombardimi i NATO-së më 24 mars 1999.

“Ajo që na ndihmoi dhe na dha fuqi për të përmbyllur me sukses luftën ishte dita e njëjtë, por një vit më vonë. Më kujtohet, më 24 mars 1999 kemi mbajt një takim përkujtues të kësaj dite. Të datës 24 mars 1999, ishim rreshtuar, njësitë që kishin mbet. Në një fjalim iu premtova bashkëluftëtarëve që kanë mbet edhe pak ditë apo javë deri në liri. E vërteta ishte që atë ditë në mbrëmje, si me ardh prej Zotit, erdhën sulmet e NATO-s, të prira prej Amerikës.

Lexo po ashtu Haradinaj nga Gllogjani: Lirinë e fituam, miti i Serbisë e i forcave serbe u thye këtu

Ajo ditë për shqiptarët është lajmi më i mirë që kanë marr. Një popull që kishte dhënë shumë gjak, erdhi forca më e madhe e NATO-s, e prirë prej Amerikës, simbol i lirisë. Ne do të luftonim gjithsesi, sepse lufta jonë nuk ka pas afate kohore, e pengesa e kufizime tjera. Por nga ajo ditë liria u shpejtu dhe u shpëtuan shumë jetë dhe jo vetëm kaq, u arrit që të kthehet në Kosovë i gjithë populli ynë që i kishte lëshuar trojet e veta”, vazhdoi fjalimin e tij Haradinaj duke shtuar se “Ne si Kosovë do të rreshtohemi në aleancë me NATO-n, me Amerikën dhe besoj shumë se e meritojmë partneritetin për paqe, në NATO dhe atë e meritojmë sot”. /Telegrafi/