Babai i Boris Johnson aplikon për pasaportë franceze: Gjithmonë do të jem evropian

Babai i kryeministrit britanik, Boris Johnson deklaroi se është në proces të aplikimit për një pasaportë franceze në mënyrë që të ruajë lidhjet me Bashkimin Evropian pas Brexit.

Stanley Johnson, një ish anëtar i Parlamentit Evropian, i cili votoi në vitin 2016 për të qëndruar në BE, pohoi për radio RTL se dëshiron të bëhet një shtetas francez për shkak të lidhjeve të forta familjare me Francën, raporton aljazeera.

“Nëse e kuptova mirë, unë jam francez. Nëna ime ka lindur në Francë, nëna ime ishte plotësisht franceze si gjyshi i saj. Pra, për mua, ka të bëjë me rifitimin e asaj që kam tashmë. Dhe kjo më bën shumë të lumtur”, tha 80-vjeçari.

“Unë do të jem gjithmonë evropian, kjo është e sigurt. Britanikëve nuk mund t’u thuhet: ju nuk jeni evropianë. Është e rëndësishme të keni një lidhje me Bashkimin Evropian”, shtoi ai.

Djali i tij, Boris ishte fytyra publike e fushatës për të lënë Bashkimin në referendumin e vitit 2016 dhe pretendon se Britania mund të “përparojë fuqishëm” si një shtet plotësisht sovran përtej asaj që e sheh si një BE tepër burokratike.

Mbretëria e Bashkuar zyrtarisht sonte po largohet nga orbita e BE-së, pas një lidhjeje shpesh të tensionuar 48-vjeçare me projektin evropian. /Telegrafi/