Ushtria rumune e ka ndjekur dronin rus që goditi një ndërtesë - pse nuk e rrëzoi atë?

Zëdhënësi i Ministrisë së Mbrojtjes Kombëtare të Rumanisë (MApN), Cristian Popovici ka shpjeguar pse ushtria nuk e rrëzoi dronin që gjatë natës goditi një ndërtesë dhjetëkatëshe në qendër të qytetit rumun Galați.

Ai tha se Rumania “nuk mund të rrezikojë të krijojë një rrezik më të madh se ai që po përpiqet të parandalojë” dhe se ushtria ka “kufizime shumë të rrepta” në situata të tilla, raporton Digi24.ro.

Droni u rrëzua gjatë natës mbi një ndërtesë banimi në Galați, duke shkaktuar një shpërthim dhe zjarr në një apartament në katin e dhjetë.

Për shkak të incidentit, u lëshuan paralajmërime përmes sistemit RO-Alert për zonat Braila, Tulcea dhe Galați. Nga baza ajrore Fetești u ngritën dy aeroplanë luftarakë F-16, me mbështetjen e një helikopteri IAR 330 SOCAT të forcave ajrore rumune.

Zëdhënësi Popovici përshkroi në detaje rrjedhën e ngjarjes.

“Natën rreth orës 00:18 filluan tashmë alarmet e para ajrore në zonat kufitare. Situatën e kemi monitoruar vazhdimisht me radarë tokësorë. Kur rrugët e disa grupeve dronësh treguan mundësinë e hyrjes në hapësirën kombëtare ajrore, u lëshua RO-Alert, pra alarmi ajror u dërgua tek Inspektorati i Përgjithshëm për Situata Emergjente, i cili e përcolli tek qytetarët”, tha ai.

“Një nga dronët, sinjali i të cilit në orën 01:54 hyri në hapësirën ajrore kombëtare nga drejtimi i Renit, po zbriste nga lartësia 600 metra. Ai bëri edhe disa devijime, shkakun e të cilave po përpiqemi ta përcaktojmë. U zhduk nga radarët në jug të Galațit, ndërsa disa minuta më vonë në numrin 112 u raportua zjarr si pasojë e rënies së dronit mbi çatinë e ndërtesës”, shtoi Popovici.

Gazetarët pyetën pse droni nuk u rrëzua.

“Është një pyetje legjitime dhe qytetarët duhet ta dinë se ne po bëjmë gjithçka që mundemi, por ushtria në këto situata ka kufizime shumë të rrepta, sepse nuk mund të rrezikojmë të krijojmë një rrezik më të madh se ai që po parandalojmë. Ligji na lejon të hapim zjarr ndaj këtyre objekteve të përdorura në konfliktin në Ukrainë, por vetëm në kushtet kur mbrohen jetët e popullsisë dhe prona”, deklaroi Popovici.

Nga Ministria e Mbrojtjes u sqarua gjithashtu se pilotët e aeroplanëve gjatë gjithë kohës së alarmit kishin autorizim për të vepruar ndaj objektivave.

Ministria e Mbrojtjes njoftoi se që nga fillimi i luftës në Ukrainë, në 47 raste janë gjetur fragmente dronësh në territorin e Rumanisë. Vetëm këtë vit janë regjistruar 12 raste të tilla. /Telegrafi/