Bursa komunale për 217 studentët të Deçanit, secila me vlerë 400 euro

Komuna e Deçanit ka ndarë 217 bursa komunale për studentët meritorë, duke shënuar kështu numrin më të lartë të përfituesve deri më sot. Secili student do të përfitojë nga 400 euro, si mbështetje për vazhdimin e studimeve.

Sipas njoftimit të komunës, ky rezultat paraqet një arritje të rëndësishme dhe dëshmon angazhimin e institucioneve lokale dhe kryetarit Bashkim Ramosaj për të investuar në të rinjtë dhe arsimin e tyre. Komuna thekson se procesi i ndarjes së bursave është zhvilluar me përgjegjësi dhe transparencë të plotë.

Investimi në arsim dhe krijimi i kushteve më të mira për studentët, sipas komunës, mbetet një nga prioritetet kryesore të qeverisjes lokale.

Komuna ka uruar të gjithë studentët përfitues, duke u dëshiruar suksese në rrugëtimin e tyre akademik.

(Lista e plotë e studentëve përfitues është publikuar në faqen zyrtare të Komunës së Deçanit). /Telegrafi/