June Lockhart, aktorja e njohur amerikane që mishëroi figurën e nënës për miliona shikues televizivë, ndërroi jetë në moshën 100-vjeçare në shtëpinë e saj në Santa Monica më 23 tetor 2025, nga shkaqe natyrore.
E lindur në New York në vitin 1925 në një familje aktorësh, ajo filloi karrierën që në fëmijëri dhe punoi për gati tetë dekada në film, teatër dhe televizion.
U bë e famshme si Ruth Martin në serialin "Lassie (1958) dhe më pas si Dr. Maureen Robinson në "Lost in Space" (1965), role që e bënë simbol të ngrohtësisë dhe forcës familjare në ekran.
Lockhart u shfaq gjithashtu në shumë seriale të tjera të njohura, nga "Petticoat Junction" e deri te "Grey’s Anatomy", duke ndjekur evolucionin e televizionit amerikan ndër vite.
Ajo ishte fituese e një çmimi 'Tony', dy nominimeve për 'Emmy' dhe kishte dy yje në "Hollywood Walk of Fame".
Familja e saj njoftoi se do të mbahet një ceremoni private dhe kërkoi që, në vend të luleve, fansat të bëjnë donacione për organizata bamirëse.
June Lockhart mbetet në kujtesë si “nëna e televizionit amerikan” — një figurë e dashur dhe ngushëlluese për breza të tërë shikuesish. /Telegrafi/