Drejtori ekzekutiv i Meta, Mark Zuckerberg, planifikon të investojë qindra miliarda dollarë në infrastrukturën e inteligjencës artificiale (AI), me qëllim ndërtimin e një projekti "Superinteligjencë".
"Ne po ndërtojmë rrjete kompjuterike me disa gigavat energji", tha Zuckerberg, transmeton Telegrafi.
Meta ka mbetur prapa në AI gjeneruese, e cila dominohet nga OpenAI, që nga lansimi i ChatGPT dhe Google Gemini.
Të gjithë liderët në industri janë përqendruar në të ashtuquajturën "inteligjencë të përgjithshme artificiale", ose "superinteligjencë me aftësi njohëse" superiore ndaj njerëzve, të aftë për të bërë zbulime shkencore dhe teknologji të reja vetë.
"I pari (rrjet kompjuterik), të cilin e kemi quajtur Prometheus, do të jetë funksional në vitin 2026. Ne gjithashtu po ndërtojmë Hyperion, i cili do të jetë në gjendje të arrijë një kapacitet prej pesë gigavatësh gjatë viteve", tha Zuckerberg.
Pesë gigavat energji është ekuivalente me konsumin vjetor të energjisë elektrike midis një dhe katër milion familjeve amerikane. /Telegrafi/