Mashtruan kambistin e moshuar me mesazhe me AI dhe i morën 100 mijë euro, arrestohen të rinjtë

U ndalua dhe një 37-vjeçar, pasi ka mashtruar punonjës e u ka marrë para, duke u thënë se ishte i afërt i pronarëve.

Policia e Tiranës njofton sot në 24 gusht se ka finalizuar brenda 24 orëve dy operacione kundër mashtrimit dhe vjedhjes, duke çuar përpara drejtësisë disa persona të dyshuar.

Në operacionin “Shuma” u arrestuan B. S., 31 vjeç, dhe S. M., 23 vjeç, ndërsa R. H., 31 vjeç, është shpallur në kërkim. Sipas Policisë, grupi përdori inteligjencën artificiale gjatë komunikimit me një 70-vjeçar, të cilit iu prezantuan si persona të njohur. Ata e bindën të dorëzonte 100 mijë euro, me premtimin se paratë do t’i ktheheshin pas disa orësh.

Kur shuma nuk u kthye në orarin e premtuar, 70-vjeçari njoftoi menjëherë policinë. Hetimet vijojnë për kapjen e personit të shpallur në kërkim, identifikimin e personit që mori paratë dhe zbardhjen e përfshirjes së personave të tjerë.

Ndërkohë, në operacionin tjetër “Imazhi” u kap dhe u ndalua G. B., 37 vjeç, i shpallur më parë në kërkim. Ai dyshohet se ka mashtruar punonjës në dy biznese duke u thënë se ishte i njohur i pronarëve dhe ka marrë 20 mijë lekë, ndërsa më pas dyshohet se ka vjedhur një çantë me 25 mijë lekë.

Policia apelon për vigjilencë të shtuar, veçanërisht ndaj kontakteve dhe videove të krijuara me inteligjencë artificiale, dhe kërkon denoncimin e menjëhershëm të çdo rasti të dyshimtë.

“DVP Tiranë/Finalizohen gjatë 24 orëve të fundit, 2 operacione kundër krimeve ekonomike për zbardhen e raste me pasoja në fushën e mashtrimit dhe të vjedhjes.

Në njërin prej rasteve, autorët kanë mashtruar një shtetas duke përdorur inteligjencën artificiale, gjatë komunikimit.

Si rezultat i veprimeve të thelluara hetimore të kryera nga specialistët e Sektorit për Hetimin e Krimit Ekonomik dhe Financiar, si dhe nga shërbimet e Komisariateve të Policisë Nr. 1 dhe Nr. 2, pas kallëzimeve të disa qytetarëve për raste mashtrimi dhe/ose vjedhjeje në subjektet e tyre, u finalizuan, në 24 orë, 2 operacione për zbardhjen e këtyre krimeve dhe nxjerrjen e autorëve të tyre përpara përgjegjësisë penale. Konkretisht:

Në kuadër të operacionit të koduar “Shuma”, u arrestuan shtetasit B. S., 31 vjeç, dhe S. M., 23 vjeç, si dhe u shpall në kërkim shtetasi R. H., 31 vjeç.

Këta shtetas, duke përdorur inteligjencën artificiale dhe duke iu prezantuar një 70-vjeçari, përmes mesazheve, si të njohur të tij, e kanë mashtruar 70-vjeçarin që ushtronte aktivitetin e këmbimit të valutave dhe i kanë marrë 100 000 euro me justifikimin se do t’ia kthenin pas disa orësh. 70 vjeçari, pasi nuk ka marrë shumën e dhënë në orën e premtuar, ka njoftuar menjëherë Policinë.

Operacioni vijon për kapjen e shtetasit R. H., si dhe për identifikimin dhe kapjen e shtetasit që ka shkuar te subjekti i 70-vjeçarit dhe ka marrë shumën e eurove, si dhe të shtetasve të tjerë që mund të jenë përfshirë në këtë rast.

Në kuadër të operacionit të koduar “Imazhi”, u kap dhe u ndalua shtetasi i shpallur në kërkim, G. B., 37 vjeç, i cili dyshohet se:

më datë 14.08.2026, ka marrë 20 000 lekë, në 2 biznese, në rrugët “Brigada VIII” dhe “Teodor Keko”, duke mashtruar punonjësit se ishte i njohur i pronarëve të subjekteve dhe se do t’ua kthente paratë menjëherë, ndërsa më datë 21.08.2026, ka vjedhur një çantë me 25 000 lekë brenda, në një subjekt në rrugën “Skënder Luarasi”.

Vijon hetimi për të zbardhur dhe dokumentuar plotësisht veprimtaritë kriminale të 37-vjeçarit.

Materialet procedurale iu referuan Prokurorisë, për veprime të mëtejshme.

Policia e Shtetit apelon për qytetarët dhe administratorët e subjekteve që të tregojnë vigjilencë dhe kujdes të shtuar ndaj rasteve të mashtrimit, si dhe që në asnjë rast të mos japin para ose të dhëna shtetasve të paverifikuar që i kontaktojnë në mënyra të ndryshme përfshi dhe videot e krijuara me inteligjencë artificiale.

Gjithashtu, Policia e Shtetit fton për denoncim të menjëhershëm të çdo dyshimi, personi të dyshuar, indicieje apo rasti kur bien pre e veprave penale në këtë fushë, pasi vetëm nëpërmjet bashkëpunimit të shpejtë dhe të ngushtë mundësohet identifikimi dhe kapja e autorëve, si dhe mbrojtja e pronës dhe pasurisë së qytetarëve“, njoftojnë uniformat blu.