Kapet me pushkë gjysmë-automatike dhe municion, arrestohet një burrë në afërsi të rezidencës së zëvendëspresidentes Kamala Harris

Shërbimi Sekret amerikan ka njoftuar se në afërsi të rezidencës së zëvendëspresidentes Kamala Harris, është arrestuar një burrë nga Teksasi pasi është kapur me armë – përkatësisht pushkë gjysmë-automatike AR-15, 113 fishekë të paregjistruar dhe rreth pesë karikatorë tjerë me nga 30 fishekë, shkruan CNN.

Shërbimi Sekret që është përgjegjës për sigurinë e presidentit Joe Biden dhe zëvendëspresidentes Harris, ka bërë të ditur se 31-vjeçari Paul Murray është arrestuar dhe dërguar në afërsi të kompleksit qeveritar ku edhe gjendet rezidenca e zëvendëspresidentes, transmeton Telegrafi.

E policia në Washington përmes një kumtese ka njoftuar opinionin publik se Murray është arrestuar, dhe se kundër tij është ngritur aktakuzë. Arrestimi ishte bërë bazuar në përshkrimin që e kishin lëshuar organet e sigurisë në Teksas.

Policia ka theksuar se Murray akuzohet për bartje të armës – pushkës dhe posedim të municionit të paregjistruar. Pushka dhe municioni janë gjetur në veturën e të arrestuarit. /Telegrafi/