Italia kalon ligjin që lë Shqipërinë pa 28 mijë vende pune

Pavarësisht se kishte një shpresë të vakët shtyrje pas rezultateve të “referendumit Renzi”, Senati italian e ka miratuar sot paketën për buxhetin e vitit të ardhshëm, ku përfshihet edhe ligji që parashikon masa shtrënguese për bizneset call-center që veprojnë në vendet jo-anëtare të Bashkimit Evropian.

Mediat italiane njoftojnë se Paketa u miratua me 173 vota pro dhe 108 kundër.

Ligji i miratuar sot pritet të ketë një ndikim të drejtpërdrejtë në ndërmarrjet e këtij sektori në Shqipëri, ku pjesa më e madhe janë biznese italiane, ose të lidhura me Italinë.

Në këtë sektor në Shqipëri llogaritet të jenë të punësuar rreth 28 mijë persona, pjesa dërrmuese e të cilëve të rinj.