Hapet biblioteka angleze “The Story Corner” në Universitetin "Isa Boletini" në Mitrovicë
Sot në Universitetin “Isa Boletini” në Mitrovicë është hapur biblioteka angleze “The Story Corner”.
Ky projekt është financuar nga Ambasada e SHBA-së në Kosovë, përmes Programit të Granteve të Vogla të Bordit të Shkëmbimit Arsimor Shtetet e Bashkuara-Kosovë (USKEB), shkruan Telegrafi.
Kjo bibliotekë përbëhet nga pothuajse 50 tituj në anglisht, që përfshin letërsinë klasike, letërsinë moderne e të tjerë.
"Në një ceremoni të organizuar në këtë rast, përveç studentëve ishin të pranishëm edhe prorektorët e UIBM dhe zyrtarë nga administrata. Projekti i bibliotekës dhe ngjarja e hapjes u planifikuan dhe zbatuan nga asistentet amerikane të Fulbright-it për mësimin e anglishtes Audra Pesko (Universiteti i Mitrovicës) dhe Peyton D’Anthony (Universiteti i Prishtinës)", thuhet në njoftim.ë
Në këtë ngjarje u shfaqën edhe libra të dhuruar nga Suedia, Zvicra dhe Italia.
Në shenjë respekti për realizimin e këtij projekti, prorektorja për Bashkëpunim Ndërkombëtar dhe Projekte, prof.asoc.dr. Edita Bekteshi, ka ndarë mirënjohje për dy asistentet amerikane. /Telegrafi/