Të martën, më 11 nëntor 2025, universi hap “Portën Numerologjike”, portalin 11/11, ditën kur energjitë shpirtërore rreshtohen dhe ajo që deri dje dukej e pamundur bëhet e arritshme
Nga pikëpamja astrologjike dhe numerologjike, 11.11 konsiderohet një nga ditët më të fuqishme të vitit – moment kur mendimet, qëllimet dhe vibrimet tona përputhen me nivele më të larta të vetëdijes. Është dita kur universi dëgjon me kujdes dhe fjalët, dëshirat e vizualizimet tona marrin forcë për të ndryshuar rrjedhën e jetës.
Në numerologji, numri 11 është “numër kryesor”, simbol i intuitës, ndriçimit dhe fillimeve të reja. Kur dyfishohet, energjia e tij shumëfishohet, duke hapur kanalin drejt vetëdijes së lartë dhe manifestimit të përshpejtuar të dëshirave.
Këtë vit, portali 11/11 përkon me lëvizjen retrograde të Jupiterit, planetit të zgjerimit dhe urtësisë, në shenjën e Gaforres, që lidhet me shtëpinë, emocionet dhe rrënjët. Kjo periudhë sjell fokus në rritjen e brendshme, shërimin emocional dhe rikthimin te vetvetja, më shumë se në ndryshimet e jashtme.
Sipas astrologëve dhe numerologëve bashkëkohorë (The Astrology Podcast, Astrology University, Café Astrology), ky portal përfaqëson një moment të rrallë për përqendrim të energjisë, meditimin e qëllimeve dhe përqafimin e transformimit të brendshëm që çon drejt vetëdijes më të lartë.
Jupiteri retrograd: Kthim drejt rrënjëve
Kur Jupiteri ecën retrograd, energjia e tij drejtohet përbrenda. Në vend që të zgjerojë horizontet jashtë nesh, ai na fton të zbresim në thellësinë e vetes, të pyesim veten çfarë na plotëson me të vërtetë, ku kërkojmë siguri dhe çfarë na sjell paqe. Ky proces mund të nënkuptojë ballafaqim me plagë të vjetra, rikthim te vlerat familjare apo rishikim të asaj që për ne përfaqëson stabilitetin. Deri në mars 2026, kur Jupiteri do të rifillojë lëvizjen e drejtë, shumë njerëz do të kenë fituar ndjesi më të qartë qëllimi dhe një bazë emocionale më të fortë.
Dy energji të fuqishme: Introspeksioni dhe manifestimi
Bashkimi i energjisë së portalit 11/11 me atë të Jupiterit retrograd krijon një fushë të fuqishme për transformim të brendshëm dhe zgjerim të vetëdijes. Është koha për qetësi, meditimin e qëllimeve dhe për krijimin e hapësirës për gjithçka që dëshironi të ftoni në jetën tuaj. Ky nuk është moment për nxitim, por për harmonizim të vetëdijshëm me shpirtin.
Si të përdorni fuqinë e portalit 11/11
Metoda e skenarit: merrni një fletore dhe shkruani dëshirën sikur tashmë është përmbushur, në kohën e tashme: “Kam…”, “Jetoj…”, “Jam mirënjohës…”. Përfshini emocionin dhe besimin.
Metoda e pëshpëritjes: mbyllni sytë, qetësoni frymëmarrjen, vizualizoni atë që dëshironi dhe pëshpëriteni tri herë. Thuhet se në këtë ditë universi dëgjon më qartë. Më e rëndësishmja është të ndjeni atë që kërkoni. Portali 11/11 reagon ndaj vibrimit të mirënjohjes, besimit dhe paqes së brendshme, transmeton Telegrafi.
Parashikimet për shenjat
Dashi – guxim për një cikël të ri
Portali zgjon flakën tënde të brendshme dhe të kujton se je lindur për të vepruar. Kjo energji hap mundësi të reja që kërkojnë besim dhe iniciativë. Ide që ke mbajtur gjatë tani kërkojnë realizim. Kujdes të ruash ekuilibrin midis pasionit dhe vetëdijes.
Demi – manifestim përmes qëndrueshmërisë dhe besimit
Për Demët, portali sjell mundësi për t’i kthyer idetë në realitet. Është momenti për të forcuar bazat – në karrierë, marrëdhënie apo financa. Çelësi është durimi dhe besimi në proces.
Binjakët – qartësi mendimi dhe fuqia e fjalës
Ky portal hap kanalin midis mendjes dhe shpirtit tënd. Fjalët që thua tani kanë ndikim të fortë. Shprehu me qartësi dhe butësi, zëri yt ka fuqinë të shërojë dhe të frymëzojë.
Gaforrja – shërim i zemrës dhe i emocioneve
Portali prek drejtpërdrejt trupin emocional. Kjo është kohë për të falur veten, për të lëshuar të kaluarën dhe për të rikthyer ndjenjën e sigurisë. Ndjeshmëria jote është dhuratë, përdore për t’u rilidhur me dashurinë.
Luani – dritë që udhëheq të tjerët
Universi të fton të shkëlqesh, por jo për lavdi personale, por për të frymëzuar. Krijimtaria jote tani ka forcë magnetike, dhe gjithçka që bën nga zemra mund të marrë formë të qëndrueshme.
Virgjëresha – integrim i dijes dhe shërimit
Ky portal kërkon balancë midis praktikës dhe shpirtërores. Mund të ndiesh nevojën për të ndryshuar rutinën ose për të sjellë harmoni në trup dhe mendje. Shërimi vjen nga vetëdija dhe përkushtimi ndaj mirëqenies.
Peshorja – ekuilibër dhe paqe karmike
Energjia e portalit ndihmon në rivendosjen e ekuilibrit në marrëdhënie. Është koha të njohësh kufijtë e tu dhe të veprosh nga dashuria, jo nga frika. Vërtetësia dhe qetësia do të të çojnë drejt harmonisë.
Akrepi – transformim i thellë dhe rilindje
Portali të udhëheq drejt ndryshimit të brendshëm. Është periudhë pastrimi emocional, lëshimi i së vjetrës dhe përqafim i energjisë së re. Nga hiri ngrihet versioni yt më i fortë dhe më i vetëdijshëm.
Shigjetari – zgjerim i ndërgjegjes dhe horizonte të reja
Universi të fton të dalësh nga e njohura dhe të kërkosh kuptim më të thellë. Mund të ndiesh frymëzim për të mësuar, udhëtuar apo ndarë përvojat me të tjerët. Sinjal i qartë për rritje shpirtërore.
Bricjapi – ndërtim i strukturave të reja
Koha për t’i dhënë formë njohurive dhe përvojave të fundit. Energjia e portalit të ndihmon të krijosh baza të forta për sukses afatgjatë. Disiplina dhe besimi bashkohen për të ndërtuar qëndrueshmëri.
Ujori – valë ndryshimi dhe zgjim i vizionit
Idetë që kanë qenë “para kohe” tani gjejnë hapësirë për të lulëzuar. Mund të ndiesh thirrje për të vepruar në fushën krijuese apo shoqërore. Vizionet që ke janë të nevojshme për botën.
Peshqit – intuitë, besim dhe bashkim shpirtëror
Ky portal hollon perden mes botës fizike dhe shpirtërore. Intuita jote është më e fortë se kurrë. Përqafon ndjeshmërinë, kreativitetin dhe besimin, ato do të të udhëheqin drejt qetësisë dhe frymëzimit të brendshëm. /Telegrafi/
