Partia opozitare gjermane, Unioni Kristian Demokrat (CDU), njoftoi sot se ka zgjedhur Friedrich Merz si kandidat për kancelar në zgjedhjet federale të vitit të ardhshëm.
Zgjedhja u njoftua në një konferencë për shtyp ku folën Merz dhe Markus Soder, kryeministri i Bavarisë dhe lider i Unionit Kristian Social (CSU), i cili ishte gjithashtu kandidat për këtë pozitë.
Zeder theksoi se ai e mbështet plotësisht Merzin dhe se ata ishin të bashkuar nga qëllimi i përbashkët për të rrëzuar qeverinë aktuale "dhe për ta kthyer Gjermaninë në rrugën e duhur".
Merz falënderoi Zederin për mbështetjen dhe tha se partia e tij, e cila u drejtua për vite nga ish-kancelarja, Angela Merkel, ka një "synim të fortë për të marrë përsëri përgjegjësinë e lidershipit në vend".
Ky vendim paraqet sfidë për kancelarin aktual, Olaf Scholz, në zgjedhjet e planifikuara për në muajin shtator të vitit 2025.
Scholz ka thënë se dëshiron të kandidojë sërish për kancelar, por partia e tij nuk e ka konfirmuar këtë, shkruan reuters.
Merz aktualisht konsiderohet favorit, pasi Zeder nuk arriti të fitojë mbështetjen për kandidaturën e tij, sipas raportimeve të mediave gjermane.
Gjermanët përballen me zgjedhjet vitin e ardhshëm në një kohë kritike, pasi vendi po përpiqet të integrojë një numër të madh refugjatësh ndërsa ekonomia dobësohet. Sulmet e fundit ekstremiste kanë nxitur një rritje të mbështetjes për të djathtën ekstreme.
Ndryshe, sondazhet tregojnë se Demokristianët janë aktualisht partia më e fortë në vend. /Telegrafi/