Aksident me vdekje në Shkodër, ambulanca përplaset me një automjet

Një aksident i rëndë me pasojë vdekjen ka ndodhur mesditën e sotme në aksin rrugor Shkodër – Koplik, pranë fshatit Çezme në Malësinë e Madhe.

Sipas burimeve zyrtare, një automjet është përplasur me një ambulancë, duke shkaktuar humbjen e jetës së shtetasit Abaz Kuka, 55 vjeç. Autoritetet policore dhe grupi hetimor kanë mbërritur në vendngjarje për të përcaktuar shkaqet e aksidentit dhe rrethanat e plota të përplasjes.

55-vjeçari po udhëtonte në automjet së bashku me vajzën e tij 18-vjeçare, e cila po merr kujdesin e nevojshëm mjekësor në spital.

Ndërkohë, trafiku në këtë segment është rënduar përkohësisht, ndërsa ekipet e emergjencës kanë ndërhyrë për të menaxhuar situatën. Hetimet për zbardhjen e ngjarjes vijojnë.

Shkodër/Informacion paraprak

Rreth orës 08:35, në aksin rrugor “Shkodër-Hani i Hotit”, autoambulanca me drejtues shtetasin P. S. është përplasur me automjetin me drejtues shtetasin A. K., 57 vjeç dhe 2 pasagjerë.

Si pasojë e aksidentit janë dëmtuar shtetasi A. K., i cili ka humbur jetën në Spitalin Rajonal Shkodër, dhe pasagjerja në automjet, vajza e tij, shtetasja D. K., 18 vjeçe, e cila ndodhet në kujdesin e mjekëve.

Me shtetasin P. S. po kryhen veprimet procedurale.

Grupi hetimor po punon për sqarimin e rrethanave të aksidentit.