Ademi: Viti shkollor nuk është e patjetërsueshme të përfundojë më 10 qershor

Viti shkollor nuk është e patjetërsueshme të përfundojë më 10 qershor, theksoi në konferencën e sotme për shtyp, Arbër Ademi, anëtar i Bashkimit Demokratik për Integrim dhe njëherësh ministër i Arsimit dhe Shkencës, lidhur me masat qeveritare që të ndërpritet mësimi për 14 ditë për shkak të koronavirusit.

“Në arsimin fillor kemi Ligj të ri për arsimin fillor ku është paraparë se sa ditë mësimore duhet t’i ketë viti shkollor. Gjithashtu është paraparë qartë si kristali dhe në mënyrë koncize se çfarë duhet të bëjnë institucionet kompetente kur kemi ndërprerje të mësimit në rast epidemie dhe gjendjeve të jashtëzakonshme. I kemi dy opsione. Viti shkollor nuk është e patjetërsueshme të përfundojë deri më 10 qershor. Opsioni i dytë është përgatitja e programeve
mësimore të shkurtuara. Para se të përcaktohemi për cilindo opsion duhet të ndryshojë dhe të plotësohet kalendari vjetor për organizimin e mësimit. Kështu që institucionet arsimore do të njoftohen me kohë nga ana jonë. Ky ndryshim dhe plotësim i kalendarit mund të bëhet edhe tani edhe pas 14 ditësh, varësisht se me çfarë situatash dhe gjendjesh do të ballafaqohemi”, tha Ademi.

Ademi theksoi se për shkollat e mesme mësimi mund të organizohet gjatë fundjavave ose me programe të shkurtuara.

Ai u bëri apel komunave dhe drejtorive të shkollave të organizojnë dezinfektimin e institucioneve arsimore, konkretisht të shkollave fillore dhe të mesme.

Zëvendësministri i Shëndetësisë, Armend Asllani u bëri apel të gjithë qytetarëve të cilët vijnë prej rajoneve të rrezikuara gjatë kalimit në vendkalimet kufitare të japin informacione të sakta që të shmanget përhapja e koronavirusit.