Xhaçka: Jemi me Kosovën, autoritetet serbe të mos i justifikojnë barrikadat dhe grupet kriminale

Ministrja e Jashtme e Shqipërisë, Olta Xhaçka ka reaguar pas zhvillimeve në veri të Kosovës, duke thënë se barrikadat që janë ngritur në veri të Kosovës, janë skena që të kujtojnë ditët e errëta të viteve ’90-ta.

“Po ndjekim me keqardhje minutë pas minute shfaqjen e një krize të tejzgjatur në mënyrë artificiale në veri të Kosovës dhe jemi thellësisht të shqetësuar nga përshkallëzimi i tensioneve. Barrikadat që janë ngritur në veri, jo prej ndonjë vale zemërimi popullor, por nga një grup kriminelësh famëkeq, nuk po pengojnë thjesht vijimin normal të jetës. Ato janë po ashtu skena që të kujtojnë ditët e errëta të viteve 1990 të cilat rajoni ynë i ka lënë pas njëherë e mirë bashkë me ish Jugosllavinë që shkoi e vate”, ka shkruar Xhaçka në një postim në Facebook.

“Për pak vjen viti 2023! Kjo nuk është koha për të bërë kërcënime ushtarake apo për sulme të papranueshme kundër Policisë së Kosovës, KFOR dhe Policisë së EULEX. Kjo është koha për dialog dhe bashkëpunim. Kjo përballje e rrezikshme duhet të marrë fund dhe autorët duhet të nxirren përpara drejtësisë. Ne jemi me Kosovën në këtë situatë të vështirë dhe i bëjmë thirrje autoriteteve serbe të mos i justifikojnë as barrikadat e as grupet kriminale që refuzojnë t’i largojnë ato. Të luash me zjarrin është një ide shumë e keqe për të ardhmen e të gjithë fëmijëve tanë”, ka shkruar Xhaçka.

Ndryshe, në kohën kur tensionet ne veriun e Kosovës po përshkallëzohen me vendosjen e barrikadave të reja në Mitrovicë, qytetarë dhe aktivistë u mblodhën sot përpara Ambasadës së Serbisë në Tiranë për të protestuar.

Me flamuj kombëtarë dhe pankarta në mbështetje të Kosovës, protestuesit janë mbledhur para ambasadës së Serbisë duke thirrur “Kosovë-Shqipëri ne jemi një” dhe “Mitrovica është Shqipëri”. /Telegrafi/