Ukraina tregon se pse filluan inkursionin brenda Rusisë

Rusia ka tërhequr një pjesë të forcave nga jugu i Ukrainës dhe i ka kthyer ato në territorin e saj në përpjekje për t’i rezistuar inkursionit të forcave ukrainase, tha sot një zyrtar ukrainas.

Inkursioni i befasishëm i Ukrainës në Kursk, i cili nuk ka pushuar pas një jave, shkaktoi një bllokim në Moskë, ku presidenti rus, Vladimir Putin shprehu zemërimin pasi Ukraina pushtoi dhjetëra vendbanime dhe pjesë të konsiderueshme të territorit në rajonin Kursk të Rusisë.

“Rusia ka zhvendosur disa nga njësitë e saja nga rajonet e Zaporizhzhia dhe Kherson në jug të Ukrainës”, tha për Politico, Dmytro Lykhoviy, një zëdhënës i ushtrisë ukrainase.

Politico nuk mund të konfirmonte në mënyrë të pavarur se sa trupa ruse u kthyen përtej kufirit, megjithëse Lykhoviy tha se ishte një numër “relativisht i vogël” trupash.

Në përpjekje për të kundërshtuar inkursionin ukrainas, trupat ruse, megjithatë, vazhduan ofensivën e tyre në Pokrovsk dhe gjetkë në rajonin e Donetskut të Ukrainës, njoftoi Shtabi i Përgjithshëm i Ushtrisë ukrainase.

Por Likhovy tha në televizionin ukrainas se Rusia po e zhvendos personelin në “drejtime të tjera, duke përfshirë në Kursk”.

“Ne ende duhet të kuptojmë nëse është diçka e rëndësishme apo thjesht një perde tymi”, shtoi zëdhënësi i ushtrisë ukrainase. /Telegrafi/