Të lënduarit nga zjarri në Koçan, tre pacientë kthehen sot nga Suedia dhe Greqia

Ministria e Shëndetësisë informon se tre pacientë të lënduar nga zjarri në Koçan po kthehen sot në vend, prej të cilëve dy ishin të shtruar në Greqi dhe një në Suedi. Sipas protokolleve, ata do të mbahen nën vëzhgim për 24 orë.

Nga ministria shtojnë se në Serbi mbeten të shtruar 23 pacientë, në Bullgari 14, në Turqi 10, në Greqi 8, në Slloveni 4, ndërsa në Hungari, Kroaci, Spanjë, Austri dhe Lituani nga 3 pacientë. Në Itali dhe Poloni është shtruar nga një pacient.

“Në Shkup, në Klinikën e Toksikologjisë, dje u shtrua një pacient pas kthimit nga Polonia, i cili sot do të lirohet për trajtim në shtëpi. Në Klinikën e Kirurgjisë Plastike mbeten dy pacientë, ndërsa në Klinikën Kirurgjike “Shën Naum i Ohrit” gjenden 6 pacientë. Në Spitalin e Përgjithshëm “8 Shtatori” janë të shtruar 5 pacientë, nga të cilët njëri pritet të lirohet sot për trajtim shtëpiak. Në Klinikën e Pulmologjisë ndodhen dy pacientë, ndërsa në spitalin privat “Sistina” janë të shtruar tre pacientë”.

“Ministria e Shëndetësisë po ndjek me kujdes gjendjen e pacientëve të lënduar dhe mbetet në komunikim të vazhdueshëm me ekipet mjekësore brenda dhe jashtë vendit, e përkushtuar për të siguruar kujdesin më të mirë të mundshëm për të prekurit nga tragjedia në Koçan”, thonë nga MSH./Telegrafi/