Spektakli automobilistik vazhdon në Gjakovë

Pas pjesëmarrjes në garën në Zagreb, emocionet e automobilistëve kosovarë rikthehen në kampionatin vendor. Të dielën në Gjakovë zhvillohet gara e tretë e disiplinës rrethore, ndërsa e pesta në përgjithësi për kampionatin e sivjetmë.

Federata e Auto Sportit e Kosovës, në bashkëpunim me Auto Klubin Gjakova 137, tashmë i kanë bërë të gjitha përgatitjet, si në shteg ashtu edhe ato organizative, prandaj u mbetet “kaskaderëve” tanë që të dhurojnë spektaklin e radhës.

Është më se e qartë se interesimi për këtë garë do të jetë mjaft i madh, jo vetëm për faktin që gjakovarët janë dëshmuar si dashamirë të këtij sporti, por edhe për shkak se kampionati po bëhet gjithnjë e më interesant.

Ndërkohë, krahas organizimit të garave, FASK-ja po angazhohet edhe në organizimin e trajnimeve dhe përvojave të ndryshme për stafin e saj.

Në këtë vazhdë, pritet që së shpejti në Kosovë të arrijë një delegacion prej shtatë anëtarësh nga Kroacia, i përbërë nga ekspertë të sportit të automobilizmit, të cilët janë shprehur të gatshëm që përvojën e tyre ta bartin edhe tek zyrtarët e FASK-së. /Telegrafi/