Si do të arsyetohet Ukraina për shfrytëzimin e raketave amerikane?

Ukraina do të argumentojë se përdorimi i raketave të furnizuara nga SHBA-ja lidhet me Kurskun.

Analist ushtarak dhe i sigurisë, Michael Clarke ka analizuar zhvillimet e fundit në Ukrainë dhe Rusi.

Ai tha se inteligjenca perëndimore ka të ngjarë të jetë përdorur për sulmet ndaj Rusisë duke përdorur raketa amerikane, shkruan skynews.

“Inteligjenca perëndimore nuk është e domosdoshme, por është shumë e dobishme sepse të lejon të jesh i saktë”, tha ai.

“Pasuritë e inteligjencës perëndimore mund të lokalizojnë forcat ruse dhe depot e municioneve, edhe nëse ato janë në lëvizje – automjetet ose kolonat e municioneve. Dhe ukrainasit nuk mund ta bëjnë këtë vetë, prandaj mund të marrin inteligjencë nga ne. Disa nga armët që përdorin ukrainasit përdorin teknologji perëndimore, kështu që nuk kemi fshehur asgjë për këtë”, pohoi ai.

Sipas raporteve të mëparshme, raketat synonin depon ushtarake në Karachev, Bryansk – që është më shumë se 160 kilometra në veri të Kurskut.

Raportet fillestare tregonin se SHBA-ja kishte autorizuar përdorimin e këtyre raketave për sulme në Rusi, por kufizoheshin vetëm në rajonin e Kurskut, ku Ukraina vazhdon të mbajë disa territore pas një inkursioni në muajin gusht.

Profesori britanik deklaroi se “sipas ukrainasve, ata synonin Njësinë e 146-të të Mbështetjes Logjistike, që pothuajse me siguri përfshinte municione. Dhe kjo është rreth 200 km larg nga Kursku, brenda rrezes së sulmit. Me shumë mundësi u qëlluan gjashtë raketa. Është e vështirë të besohet që rusët rrëzuan pesë prej tyre, ndoshta një, por nuk njoh ndonjë sistem mbrojtës që mund të përballet me gjashtë raketa ATACMS të njëpasnjëshme”.

“Janë raketa balistike, dhe është si të përpiqesh të godasësh një predhë artilerie ndërsa bie nga një lartësi e madhe – shumë e vështirë”, shtoi ai.

Ukraina synon të depërtojë më thellë brenda Rusisë për të dëmtuar logjistikën dhe furnizimet, veçanërisht municionet që po transportohen drejt rajonit të Kurskut.

“Ukrainasit do të argumentojnë se e gjitha kjo lidhet me Kurskun”, përfundoi analisti.

Ndryshe, Rusia ka nisur pushtimin e shtetit ukrainas më 24 shkurt të vitit 2022 duke shkaktuar mijëra viktima dhe dëme të shumta materiale. /Telegrafi/