Qumështi VITA prodhohet me standardet më të larta botërore

Kompania për prodhimin e qumështit Vita, Devolli Group, ka reaguar ndaj shkrimit ‘Qumësht i pluhurosur”, i botuar të premten në gazetën Express. Burimet e kësaj gazete të marra nga Dogana e Kosovës se gjoja Devolli Group është kompania që më së shumti punon me qumësht të pluhurosur, 'janë të pavërteta'.

Më poshtë mund të lexoni reagimin e plotë:

Nëse në Kosovë çdo vit futen me qindra e mijëra kilogramë qumësht pluhur, kjo nuk do të thotë se duhet t’i drejtohemi qumështores më të madhe vendore, e cila që nga viti 2003 ka filluar përpunimin e qumështit VITA, si rezultat i bashkëpunimit frytdhënës me firmën multinacionale Tetra Pak.

Vita është qumështi i parë në Kosovë, i përpunuar me teknologjinë më moderne UHT (në temperaturë të lartë) dhe i paketuar me ambalazhën Tetra Pak.

Teknologjia e lartë e përdorur në paketimet e Tetra Pak siguron qëndrueshmërinë e qumështit si dhe nuk lejon përdorimin e qumështit pluhur. Ushqyeshmëria dhe shija natyrale ruhen me muaj, pa pasur nevojë për ngrirje të thellë apo ndonjë formë tjetër të ruajtjes së veçantë.

Qumështorja Vita kontribuon në ekonominë vendore e posaçërisht në sektorin e bujqësisë duke punësuar mbi 150 persona, ndërsa pas përfundimit të projektit të ri (Fabrika e re në Radushë) pritet që numri i të punësuarve të rritet në 250.
Fabrika e qumështit VITA furnizohet me qumësht të freskët nga më shumë se 160 fermerë të mëdhenj në mbarë Kosovën, të cilët vazhdimisht i ndihmon duke iu dhuruar mjete për ftohjen e qumështit dhe ngritjen e cilësisë së tij. Për më tepër, qumështorja VITA ka mbi 40 pika grumbulluese të cilat furnizohen me qumësht të freskët nga më shumë se 1000 fermerë të vegjël. Gjatë këtij procesi të përpunimit të qumështit, sigurohen të ardhura të garantuara për mijëra qytetarë për çdo vit.

Nga çdo fermë mirret mostra e qumështit që i nënshtrohet analizave kimike.

Pas analizës në fermë, bëhet transportimi i qumështit deri në fabrikë për përpunim. Sapo të arrijë në fabrikë, qumështi i nënshtrohet analizës mikrobiologjike. Gjatë tërë procesit të përpunimit, që nga mjelja e deri te paketimi, qumështi asnjëherë nuk bie në kontakt me dorën e njeriut.

Si e vetmja qumështore që e zbaton udhëzimin administrativ 12/2006, VITA grumbullon sasinë më të madhe të qumështit në tërë territorin e Kosovës. Kur dihet se Kosova ka 32 fabrika për përpunimin e qumështit të freskët, qumështorja Vita grumbullon sa 31 qumështore së bashku.

Qumështorja Vita është e licensuar sipas standardeve të AUVK-së për përpunimin e qumështit. Gjithashtu është e pajisur me certifikatat ISO 22000 që është standardi më i lartë botëror për përpunimin e ushqimit.

Standardi tjetër sipas së cilit vepron qumështorja Vita është edhe HACCP, që ka të bëjë me kontrollimin e rrezikshmërisë gjatë procesit të prodhimit.

Dhe mbi të gjitha, qumështi Vita kontrollohet në baza ditore nga Instituti Kombëtar për Shëndetin Publik.

Duke vepruar gjithmonë në të mirë të konsumatorëve dhe duke pasur përgjegjësi dhe angazhim maksimal në ofrimin e qumështit me kualitet sa më të lartë, qumështorja VITA siguron se nuk përmban asnjë përqindje të qumështit pluhur. Për më shumë, mund të kontaktohen zyrtarët e Doganës së Kosovës për të mësuar saktësisht se cilat kompani importojnë qumësht pluhur.

Përkushtimi dhe angazhimi i madh për prodhimin e qumështit të freskët të kualitetit sa më të lartë, shpërblehet vazhdimisht nga konsumatorët të cilët jetojnë çdo ditë me qumështin VITA.